‘მხოლოდ 400 ლარი გვაქვს’ – დავით გაბოძის მკურნალობისთვის საკმარისი თანხა ვერ შეგროვდა

ავტოავარიის შედეგად, ეტლს მიჯაჭვულ დავით გაბოძეს მკურნალობა საზღვარგარეთ სჭირდება. საფრანგეთში წასვლამდე სულ ოთხი დღე რჩება, თანხა კი ვერ შეგროვდა. მას ჯერ მხოლოდ თვითმფრინავის ბილეთები და ანგარიშზე 400 ლარი აქვს, არადა მკურნალობისთვის დაახლოებით 1000 ევროა (4 000 ლარამდე) საჭირო.

„11 ნოემბერს გვაქვს ფრენა, 10-ში წავიყვანთ თბილისში, მაგრამ თანხა არ გვაქვს. 400 ლარია მხოლოდ ანგარიშზე. თუ ვერ შეგროვდა არც გაგვიშვებენ საზღვარზე. მკურნალობა უცხოეთში სჭირდება, რომ ეს დაზიანებები, რაც ამ რვა წელში დაუგროვდა დაუმუშაონ“, - ამბობს დათოს და ნათია გაბოძე.

ახლობლების განმარტებით, მისი მდგომარეობა მძიმეა: „აქვს ნაწოლები ორივე გვერდზე, საშარდე ბუშტში ჩადგმული მილები დაჩირქდა, განვითარდა სეფსისი. აქვს ციება, ოფლიანობა, მაღალი სიცხე. ამ ყველაფერმა ძალიან დაასუსტა“.
დავით გაბოძე წლების განმავლობაში ახალციხის ტელეკომპანია „მეცხრე არხში“ ოპერატორად მუშაობდა. ავტოავარიის შემდეგ კი იგი ამავე ტელევიზიაში მემონტაჟე იყო. მუშაობას თავი რამდენიმე თვის წინ დაანება.

ავტოავარია, რომელშიც დავით გაბოძე მოჰყვა, 2011 წლის იანვარში, ახალციხე-აბასთუმნის საავტომობილო გზაზე, ფარეხასთან მოხდა.

მანქანაში მსხდომი ოთხი ადამიანიდან სერიოზული დაზიანებები მხოლოდ დავით გაბოძემ მიიღო. მრავლობით დაჟეჟილობებსა და მოტეხილობებთან ერთად, მას რამდენიმე ადგილას გაუტყდა თავის ქალა და დაუზიანდა ხერხემალი. პირველი ოთხი ოპერაცია საქართველოში ჩაუტარდა მათ შორის ხერხემალზე და თავის ქალაზეც.

მისი მკურნალობისთვის 2011 წელს საქველმოქმედო ღონისძიება გაიმართა, საიდანაც შემოსული თანხით გაბოძე უკრაინაში გაემგზავრა და მკურნალობის კურსი ჩაიტარა. საქართველოში ჩამოსვლის შემდეგ, მან მკურნალობაზე უარი თქვა.

ბოლო დროს მისი მდგომარეობა გაუარესდა. მას გადაუდებელი მკურნალობა სჭირდება.

გაბოძის დასახმარებლად გახსნილია ანგარიში საქართველოს ბანკში.

GE10BG0000000302243900 - მიმღები დავით გაბოძე


დათო გაბოძე - 2019 წლის მაისი

[თაკო ფეიქრიშვილი, ახალციხე]