ვინ და რამდენი ლარით გათავისუფლდება საშემოსავლო გადასახადისგან

გეგმის პრეზენტაციისას ფინანსთა მინისტრის მოადგილე ლაშა ხუციშვილმა აღნიშნა, რომ დამსაქმებლები 750 ლარამდე ხელფასის 20 პროცენტისგან სრულად გათავისუფლდებიან, 1500 ლარამდე ხელფასის შემთხვევაში კი 150 ლარის ოდენობით.

როგორც ფინანსთა სამინისტროს მიერ, გამოქვეყნებული ინსტრუქციიდან ირკვევა, გადასახადისგან გათავისუფლება არ ნიშნავს, რომ დასაქმებულებს ხელფასი გაეზრდებათ. მათი განმარტებით საწარმო თავად გადაწყვეტს, საით მიმართოს აღნიშნული თანხა.

„ეს შეღავათი ხარჯებს უმცირებს საწარმოს და მისი გადასაწყვეტია მიმართავს ხელფასის გასაზრდელად თუ უფრო მეტი დაქირავებულის შესანარჩუნებლად”, – ვკითხულობთ ინსტრუქციაში.

დასაქმებული გათავისუფლდება საშემოსავლო გადასახადისგან იმ შემთხვევაშიც, თუ კი ის რამდენიმე საწარმოში ერთდროულად მუშაობს.

სამინისტროს განცხადებით შესაბამისი ცვლილება საგადასახადო კოდექსში შევა, რაც იმას ნიშნავს რომ დასაქმებულებს დამატებითი დოკუმენტის წარგდენა არ მოუწევთ.

ცვლილება 1–ლი მაისიდან ამოქმედდება და დასაქმებულებს ექვსი თვით გაათავისუფლებს ბიუჯეტთან პასუხისმგებლობისგან.

ანტიკრიზისული გეგმის მიხედვით, რომელიც მთავრობამ 24 აპრილს წარმოადგინა, საშემოსავლო შეღავათების ნაწილში ბიუჯეტს ექვსი თვის განმავლობაში ჯამში 350 მილიონი დააკლდება.

გეგმის მიხედვით, ასევე გათვალისწინებულია უმუშევრად დარჩენილი მოქალაქეების სოციალური დახმარება, რაც ითვალისწინებს თვითდასაქმებულებისთვის ერთჯერადად 300 ლარის, ოფიციალურად დასაქმებულებისთვის კი 1 200 ლარიან დახმარებას (200 ლარი 6 თვის განმავლობაში).

კორონავირუსით გამოწვეული კრიზისის მართვა მთავრობას ბიუჯეტიდან ჯამში 3,5 მილიარდი ლარი დაუჯდება.

[რობი ზარიძე, ახალციხე]