რა არის საჭირო იმისთვის, რომ ‘მთის კანონის’ შეღავათები შეგეხოთ

იმისათვის, რომ მეწარმემ საგადასახადო შეღავათებით ისარგებლოს, მაღალმთიანი დასახლების საწარმოს სტატუსი უნდა მოიპოვოს. სტატუსის მისაღებად, მეწარმე სუბიექტებმა განცხადებით უნდა მიმართონ საქართველოს ფინანსთა სამინისტროს შემოსავლების სამსახურს.

რაც შეეხება სოციალურ შეღავათებს, იმისათვის, რომ მაღალმთიან დასახლებაში მცხოვრებმა მოქალაქემ ისარგებლოს სოციალური შეღავათებით, მასაც სტატუსი უნდა ჰქონდეს. მაღალმთიანი დასახლებაში მუდმივად მცხოვრები პირის სტატუსის მისაღებად კი მოქალაქემ განცხადებით უნდა მიმართოს მუნიციპალიტეტის გამგეობას ან მერიას

სოციალური და საგადასახადო შეღავათები:

• კანონის ამოქმედების შემდეგ დაბადებულ პირველ და მეორე ბავშვზე 1 წლის განმავლობაში ყოველთვიურად გაიცემა 100 ლარი, მესამე და შემდგომ ბავშვზე 2 წლის განმავლობაში – 200 ლარი

• სკოლებსა და პროფესიულ საგანმანათლებლო დაწესებულებებს ეზრდებათ ვაუჩერი

• მასწავლებლებს დაუწესდათ სახელფასო დანამატი არანაკლებ 35%-ის ოდენობით (ამოქმედდება 2016 წლის 1 სექტემბრიდან)

• სპეციალური რეგიონული პროგრამების მონაწილე მასწავლებლებს დაუწესდათ დამატებითი ანაზღაურება ხელფასის არანაკლებ 50%-ის ოდენობით (ამოქმედდება 2016 წლის 1 სექტემბრიდან)

• სახელმწიფო პენსიისა და სოციალური პაკეტის მიმღებ პირებს დაუწესდათ 20%-იანი დანამატი (ამოქმედდება 2016 წლის 1 სექტემბრიდან)

• დაწესდა ყოველთვიური დანამატი ექიმებისთვის – პენსიის ორმაგი ოდენობით, ხოლო ექთნებისათვის – პენსიის ოდენობით (ამოქმედდება 2016 წლის 1 სექტემბრიდან)

• მოსახლეობა ზამთრის პერიოდში უზრუნველყოფილი იქნება გათბობით (ამოქმედდება 2016 წლის 1 სექტემბრიდან)

• ანაზღაურდება ელექტროენერგიის ხარჯების 50% (ამოქმედდება 2017 წლის 1 იანვრიდან)

• კერძო სექტორში დასაქმებული პირი, კალენდარული წლის განმავლობაში, 6000 ლარის ოდენობით მიღებულ შემოსავალზე, თავისუფლდება საშემოსავლო გადასახადისგან

• 10 წლის ვადით იურიდიული პირები თავისუფლდებიან მოგებისა და ქონების გადასახადისგან, ხოლო მეწარმე ფიზიკური პირები თავისუფლდებიან ქონებისა და საშემოსავლო გადასახადისგან

• ფიზიკური პირები თავისუფლდებიან მიწის ნაკვეთზე ქონების გადასახადისგან.

[sknews.ge]