200 ლარიანი დახმარება მოქალაქეებს ხელფასის დარიცხვისთანავე შეუწყდებათ

მთავრობის გადაწყვეტილებით, ანტიკრიზისული გეგმის ფარგლებში, უმუშევრად დარჩენილი მოქალაქეების დახმარება მაისიდან დაიწყო.

„მაისში ჩამერიცხა პირველი 200 ლარი, ივნისიდან დავიწყე მუშაობა, ბუღალტერმა შემატყობინა რომ 200 ლარიანი დახმარება ივნისის თვეშიც ჩამერიცხება და შემდგომ მომეხსნება. გამოდის, რომ 1 200 ლარიანი დახმარებიდან მხოლოდ 400 ლარს მივიღებ“,– ამბობს ნარინე პეტროსიანი, რომელიც ახალციხეში, ერთ–ერთ მაღაზიაში გამყიდველად მუშაობს.

იმ ფაქტს, რომ მუშაობის დაწყების შემდეგ, მოქალაქეს დახმარება შეუწყდება, მთავრობის ადმინისტრაციაში გვიდასტურებენ.

„პანდემიის დაწყების შემდეგ, მარტში, აპრილსა და მაისში თუ მოქალაქეს არ უფიქსირდება შემოსავალი, ის მიიღებს სამივე თვეში 200–200 ლარიან დამხარებას, მაგრამ ივნისში თუ უკვე დაერიცხება ხელფასი, ავტომატურად შეუწყდება დახმარება“, – განმარტავენ მთავრობის ადმინისტრაცის საზოგადოებასთან ურთიერთობის სამსახურში.

რაც შეეხებათ იმ მოქალაქეებს, რომლებსაც არ დაუფიქრიდებათ შემოსავალი ექვსი თვის განმავლობაში, ჯამში 1 200 ლარს მიიღებენ.

[რიმა სარუხანიან, ახალციხე]