EMC-ის შეფასებით ერთჯერადი სამასლარიანი დახმარების პაკეტი ბევრ კითხვას აჩენს

ორგანიზაციის ცნობით თვითდასაქმებულთა რაოდენობა იმაზე გაცილებით მეტია, ვიდრე ეს ანტიკრიზისული გეგმითაა გაწერილი.

„ბუნდოვანია, რა ეკონომიკურ მოლოდინებს ეფუძნება მიზნობრივი ჯგუფების ზომებთან დაკავშირებული გათვლები. ეს განსაკუთრებით თვალსაჩინო სწორედ თვითდასაქმებულთა შემთხვევაშია - მათთვის განკუთვნილი სოციალური დახმარება დაახლოებით 250 000 ბენეფიციარს ითვალისწინებს, მაშინ, როცა თვითდასაქმებულთა რაოდენობა თითქმის 800 000 ადამიანია. თვითდასაქმებულთა შესახებ არსებული მწირი მონაცემების პირობებში, ეს გათვლა ზედაპირული და შესაძლოა არაზუსტი აღმოჩნდეს.

გარდა ამისა, კითხვები ჩნდება, თუ რამდენად ადეკვატურია არაფორმალურად დასაქმებულების თუ თვითდასაქმებული ადამიანების მიმართ შეთავაზებული ერთჯერადი 300 ლარიანი მხარდაჭერის პაკეტი მაშინ, როდესაც მათ და მათ ოჯახებს კრიზისის შედეგად შეუწყდათ დღიური სარჩო და დღეს შესაძლოა მათი სოციალური სტატუსი უკიდურესად გაუარესდეს“, – ნათქვამია განცხადებაში.

EMC –ს შეფასებით კითხვებს აჩენს დაქირავებით დასაქმებულთა კომპენსაციის საკითხიც.

„ასევე, დაქირავებით დასაქმებულებისთვის 6 თვის განმავლობაში ყოველთვიური 200 ლარი არსებულ საარსებო მინიმუმს, რომელიც თავის მხრივ ხარვეზიანი მეთოდოლოგიით არის დაანგარიშებული და საერთაშორისო სტანდარტებს არ შეესაბამა, მნიშვნელოვნად არ აღემატება. ეს გვაფიქრებინებს, რომ დაანონსებული შემწეობა არსებული საჭიროებების სრულყოფილ შეფასებას არ ეფუძნება.“

ანტიკრიზისული გეგმის მიხედვით, რომელიც მთავრობამ 24 აპრილს წარადგინა, საშემოსავლო შეღავათების ნაწილში ბიუჯეტს ექვსი თვის განმავლობაში ჯამში 350 მილიონი დააკლდება.

გეგმის მიხედვით, გათვალისწინებულია უმუშევრად დარჩენილი მოქალაქეების სოციალური დახმარება, რაც ითვალისწინებს თვითდასაქმებულებისთვის ერთჯერადად 300 ლარის, ოფიციალურად დასაქმებულებისთვის კი 1 200 ლარიან დახმარებას (200 ლარი 6 თვის განმავლობაში).

კორონავირუსით გამოწვეული კრიზისის მართვა მთავრობას ბიუჯეტიდან ჯამში 3,5 მილიარდი ლარი დაუჯდება.

[რობი ზარიძე]