COVID-19: თურქეთში ახალი შემთხვევები იკლებს – რა ხდება მეზობელ ქვეყნებში

ახალი შემთხვევების კლებასთან ერთად იზრდება გამოჯანმრთელებულთა რიცხვი თურქეთში, სადაც 112 261 ადამიანიდან, 33 ათასზე მეტმა ვირუსი უკვე დაამარცხა, Covid-19-ის მსხვერპლი აქ 2 900 ადამიანია.

93 558 შემთხვევაა რუსეთში, საიდანაც 8 456 გამოჯანმრთელდა, 867 კი გარდაიცვალა, აქედან 73 – გასულ 24 საათში. ქვეყანაში მესამე დღეა ახალი შემთხვევების რაოდენობა 6 ათასს აჭარბებს.

Covid-19–ით ერთი ადამიანი გარდაიცვალა დღეს სომხეთში, 59 კი ახალი შემთხვევა დაფიქსირდა. ჯამში აქ 1 867 ინფიცირების, 866 გამოჯანმრთელების და 30 გარდაცვალების შემთხვევაა.

1 717 შემთხვევაა გამოვლენილი აზრბაიჯანში, საიდანაც გამოჯანმრთელებულად 1 221 ითვლება, ხოლო 22 – გარდაიცვალა. ქვეყანაში დღეს 39 ადამიანს დაუდგინდა Covd-19.

საქართველოში ამ დროისთვის კორონავირუსის 511 დადასტურებული, 156 გამოჯანმრთელების და 6 გარდაცვალების შემთხვევაა.

ჯანდაცვის მსოფლიო ორგანიზაციამ ახალი კორონავირუსი პანდემიად 11 მარტს გამოაცხადა. საქართველოში ვირუსის პირველი შემთხვევა 26 თებერვალს დაფიქსირდა, 21 მარტიდან კი ქვეყანაში საგანგებო მდგომარეობა ამოქმედდა, რომელსაც 31 მარტს კომენდანტის საათი და „ფაქტობრივი საკარანტინო რეჟიმი“ დაემატა. 22 აპრილს საგანგებო მდგომარეობა კიდევ ერთი თვით – 22 მაისამდე გახანგრძლივდა. 24 აპრილს მთავრობამ ანტიკრიზისული გეგმა წარადგინა, რომლის მიხედვითაც დაწესებული შეზღუდვების მოხსნა 6 ეტაპად მოხდება. გარდა ამისა, გეგმით განსაზღვრულია ბიზნესის და მოქალაქეების დახმარება, რისთვისაც 3,5 მილიარდი ლარი დაიხარჯება.

[რობი ზარიძე]