საქართველოში ‘კომენდანტის საათი’ ამოქმედდა

21:00 საათიდან დილის 06:00 საათამდე, იკრძალება როგორც ქვეითად, ისე - სატრანსპორტო საშუალებით ქალაქებში და ქვეყნის მასშტაბით გადაადგილება.

პირთა გადაადგილების კონტროლისა და საგანგებო მდგომარეობის გამკაცრებული პირობების შესრულების მიზნით, ქვეყნის მასშტაბით მოქმედებს საკონტროლო პუნქტები, მათ შორის ერთი ახალციხეში.

გამშვებ პუნქტთან სამართალდამცველები დგანან.

იმ დაწესებულებების თანამშრომლებს, რომლებიც ფუნქციონირების ხასიათიდან გამომდინარე, 24-საათიან რეჟიმში მუშაობენ, სპეციალური საშვით გადაადგილების საშუალება ექნებათ. ასევე საშვს გამოიყენებენ მედიის წარმომადგენლებიც.

"საგანგებო რეჟიმის დარღვევა პირველ ჯერზე იწვევს ადმინისტრაციულ პასუხისმგებლობას, კერძოდ, მოქალაქეები 3000 ლარით დაჯარიმდებიან. ხოლო თუ იმავე ქმედებას გაიმეორებენ, მათზე გათვალისწინებული იქნება სისხლის სამართლის პასუხისმგებლობა. ეს ქმედება დანაშაულია და 3 წლამდე თავისუფლების აღკვეთას ითვალისწინებს," - აცხადებს შს მინისტრის მოადგილე ნინო ცაციაშვილი.

სრული კარანტინისა და "კომენდანტის საათის" ამოქმედების შესახებ, საკოორდინაციო საბჭომ გადაწყვეტილება 30 მარტს მიიღო.

[sknews.ge]