შესაძლოა ასპინძაში გამგებელის პოსტი ვაკანტური გახდეს

პაატა მაისურაძე

ჩატარდება თუ არა ხელახალი კონკურსი გამგებლის თანამდებობაზე ამ ეტაპზე უცნობია. ასპინძის მუნიციპალიტეტის საკრებულოსა და გამგეობაში სასამართლო გადაწყვეტილების ოფიციალურ პასუხს ელოდებიან.

„პირველი ეტაპი, რომლის დროსაც გამგებლობის კანდიდატების დოკუმენტაციის შერჩევა ხდებოდა, სასამართლომ ეს ნაწილი ცნო ბათილად, მაგრამ გადაწყვეტილება ჯერ არ ჩაგვბარებია. მოქმედება არ შეუჩერებია გამგებლისთვის,რადგან ამ ნაწილში უარი ეთქვა მოსარჩელე მხარეს. გამგებელმა თანამდებობა უნდა დატოვოს მას შემდეგ, როცა გადაწყვეტილება შევა კანონიერ ძალაში. იმ შემთხვევაში, თუ მხარეები აღარ გაასაჩივრებენ, გასაჩივრების შემთხვევაში კი საბოლოო გადაწყვეტილებას მიიღებს უზენაესი სასამართლო“,-ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი და აქვე ამატებს, რომ ახალციხის რაიონული სასამართლოს მიერ გამოტანილი გადაწყვეტილების ძალაში დარჩენის შემთხვევაში ასპინძის საკრებულო იმსჯელებს, -„გადაწყვეტილების საფუძველზე ალბათ ახალად უნდა ჩაატაროს კონკურსი, რადგან კონკურსის წესის დარღვევას ედავება სასამართლო“.

გაასაჩივრებს თუ არა ახალციხის რაიონული სასამართლოს გადაწვეტილებას ლევან ცაბაძე, რომელიც ასპინძის გამგებლის თანამდებობაზე ამ დრომდე რჩება, უცნობია, ცაბაძემ „სამხრეთის კარიბჭესთან“ კომენტარის გაკეთება არ ისურვა.

შეგახსენებთ, რომ გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. საკრებულოს 16 მაისს გამართულ სხდომაზე 22-ვე დეპუტატმა ლევან ცაბაძის კანდიდატურას ერთხმად დაუჭირა მხარი, რამაც ყოფილი კანდიდატების პროტესტი გამოიწვია.

ასპინძის მუნიციპალიტეტის გამგებლობის ყოფილმა კანდიდატმა პაატა მაისურაძემ სასამართლოში საჩივარი 24 მაისს შეიტანა. იგი ასპინძის მუნიციპალიტეტის საკრებულოს უკანონო გადაწყვეტილების გამოტანაში ადანაშაულებს. მაისურაძე აცხადებს, რომ საკონკურსო კომისიამ ტექნიკურ ხარვეზად მიიჩნია ასპინძის მუნიციპალიტეტის გამგებლის ლევან ცაბაძის უმაღლესი განათლების დამადასტურებელ დიპლომსა და შრომის წიგნაკში არსებული უზუსტობები და მისი კანდიდატურა კონკურსიდან არ მოხსნა. მაისურაძე ამბობს, რომ შეცდომაა ცაბაძის გვარსა და მამის სახელში. ასევე, დიპლომი აქვს მ.ა შოლოხოვის უნივესიტეტის სახელწოდებით და ვიდრე ეს სასწავლებელი მიიღებდა ამ სახელწოდებას, ცაბაძეს მანამდე, სამი წლით ადრე აქვს აღებული დიპლომი.

[თინათინ ზაზაძე, ასპინძა]