ასპინძის ახალარჩეულ გამგებელს უკვე უჩივიან

გამგებლობის კანდიდატი პაატა მაისურაძე ასპინძის მუნიციპალიტეტის საკრებულოს დღევანდელ გადაწყვეტლებას უკანონოდ მიიჩნევს და გასაჩივრებას გეგმავს.

მაისურაძე ლევან ცაბაძეს დოკუმენტების გაყალბებაში ადანაშაულებს: ”დღეს არის გასაჩივრების ბოლო ვადა და ვაპირებ საჩივრის შეტანას, სადაც წერია, რომ შეცდომაა ცაბაძის გვარსა და მამის სახელში. ასევე, დიპლომი აქვს მ.ა შოლოხოვის უნივესიტეტის სახელწოდებით და ჩვენ გავარკვიეთ, რომ ვიდრე ეს სასწავლებელი მიიღებდა ამ სახელწოდებას, მანამდე სამი წლით ადრე აქვს აღებული დიპლომი. ასევე გამოსახული ლოგოები დიპლომსა და ისტორიაში არის სხვადასხვა”.

მაისურაძე მომხდარში საკრებულოს თავმჯდომარის მოადგილეს მერაბ ველიჯანაშვილსა და ასპინძის ”ქართული ოცნება დემოკრატიული საქართველოს” რაიონული ორგანიზაციის თავმჯდომარეს მამუკა მელიქიძეს ადანაშაულებს.

”ველიჯანაშვილმა საკრებულოს წევრებს დაშინების მეშვეობით აარჩევინა ლევან ცაბაძე. ასევე დამნაშავეა მამუკა მელიქიძეც, რომელმაც, კონკურსის გარეშე გააყვანინა ცაბაძე, მისი რეკომენდაცია დევს საკრებულოში. ამის დამამტკიცებელი ფაქტები გვაქვს და აუცილებლად გავახმოვანებთ გენერალურ პროკურატურაში. სასამართლოში კი სარჩელი უკვე შეტანილი გვაქვს”, - ამბობს მაისურაძე.

კანონის დარღვევასა და კომისიის წევრებზე ზეწოლაზე საუბრობს გამგებლობის მეორე კანდიდატი გიორგი ჯვარიძეც.

”საკონკურსო მოთხოვნის პირობა დარღვეულია, ცაბაძეს არ აქვს ორწლიანი გამოცდილება საჯარო სამსახურში. მეორეც, დიპლომი არის გაცემული სხვა პირზე და არა ლევან ცაბაძეზე. დიპლომში არის გიორგის ძე და საბუთებში ლევანი არის გრიგორის ძე. კომისიის წევრებზე ახდნდნენ ზეწოლას მერაბ ველიჯანაშვილი და თამაზ ზედგინიძე”, - ამბობს ჯვარიძე.

კანდიდატების ბრალდებას სიცრუეს უწოდებს ასპინძის მუნიციპალიტეტის საკრებულოს თავმჯდომარის მოადგილე მერაბ ველიჯანაშვილი.

”ეს არის პიროვნული ინტერესები. მიმართეთ საპრეტენზიო სააპელაციო კომისიას და შეგიძლიათ მოითხოვოთ ოქმის ამონაწერი. ამ კომისამ განიხილა და გამოიტანა გადაწყვეტილება, კომისიამ ტექნიკური შეცდომა მხოლოდ გვარში დააფიქსირა”, - განაცხადა სატელეფონო საუბარში ველიჯანაშვილმა.

ლევან ცაბაძე კონკურეტნეტების ბრალდებებს უსაფუძვლოდ მიიჩნევს და ამბობს, რომ შეუძლიათ სასამართლოს მიმართონ.

”რა უნდა გითხრათ არ ვიცი, არსებობს შესაბამისი ორგანო, შეუძლიათ სასამართლოში იჩივლონ, რაც უნდა ის ქნან. მათ საჩივრით მიმართეს კომისიას და კომისიამ უსაფუძვლოდ ჩათვალა. რაც შეეხება დიპლომის ნამდვილობას, სასწავლებელი დავამთავრე 1997 წელს, როცა ის იყო მოსკოვის სახელმწიფო პედაგოგიური უნივერსიტეტი, 2000 წელს მას მიენიჭა შოლოხოვის სახელწოდება და რადგან დიპლომი ავიღე 2004 წელს, მიწერია შოლოხოვის სახელობის მოსკოვის სახელმწიფო უნივესიტეტი”, - განაცხადა ცაბაძემ.

[თინათინ ზაზაძე, ასპინძა]