ასპინძის გამგებლის არჩევის საქმემ სააპელაციო სასამართლოში გადაინაცვლა

ასპინძის მუნიციპალიტეტის გამგეობის წარმომადგენლებმა საჩივარი თბილისში, სააპელაციო სასამართლოში მას შემდეგ შეიტანეს, რაც ახალციხის რაიონულმა სასამართლომ გამგებლობის ყოფილი კანდიდატის პაატა მაისურაძის საჩივარი ნაწილობრივ დააკმაყოფილა.

შეგახსენებთ, რომ ასპინძის მუნიციპალიტეტის გამგებლობის ყოფილმა კანდიდატმა პაატა მაისურაძემ სასამართლოში საჩივარი 24 მაისს შეიტანა. იგი ასპინძის მუნიციპალიტეტის საკრებულოს უკანონო გადაწყვეტილების გამოტანაში ადანაშაულებს. მაისურაძე აცხადებს, რომ საკონკურსო კომისიამ ტექნიკურ ხარვეზად მიიჩნია ასპინძის მუნიციპალიტეტის გამგებლის ლევან ცაბაძის უმაღლესი განათლების დამადასტურებელ დიპლომსა და შრომის წიგნაკში არსებული უზუსტობები და მისი კანდიდატურა კონკურსიდან არ მოხსნა. მაისურაძე ამბობს, რომ შეცდომაა ცაბაძის გვარსა და მამის სახელში. ასევე, დიპლომი აქვს მ.ა შოლოხოვის უნივესიტეტის სახელწოდებით და ვიდრე ეს სასწავლებელი მიიღებდა ამ სახელწოდებას, ცაბაძეს მანამდე, სამი წლით ადრე აქვს აღებული დიპლომი.


ასპინძის გამგებელი ლევან ცაბაძე

28 აგვისტოს გამართულ სასამართლო პროცესზე მოსამართლე მარიკა ჩიტაშვილმა ასპინძაში გამგებლის თანამდებობის დაკავების მიზნით გამართული კონკურსის პირველი ეტაპი, სადაც გამგებლობის კანდიდატების დოკუმენტაციის შერჩევა ხდებოდა, ბათილად ცნო, ხოლო მოსარჩელე მხარეს უარი ეთქვა, რომ გამგებელს, ლევან ცაბაძეს უფლება-მოვალეობა შეჩერებოდა.

სააპელაციო სასამართლოში მოპასუხე მხარემ საჩივარი 13 სექტემბერს შეიტანა, როგორც ასპინძის მუნიციპალიტეტის გამგეობაში განმარტავენ, პასუხი ამ დრომდე არ მოსულა.

მოპასუხე მხარე ითხოვს, რომ საქმე განსახილველად პირველი ინსტანციის სასამართლოს დაუბრუნდეს.

“სააპელაციომ უნდა გააუქმოს და დააბრუნოს პირველ ინსტანციაში, იმიტომ, რომ გადაწყვეტილებაში იყო ხარვეზები და ამის საფუძველზე ვითხოვთ ახალციხის რაიონული სასამართლოს გადაწყვეტილების გაუქმებას“, - ამბობს ასპინძის მუნიციპალიტეტის საკრებულოს იურისტი სლავა სუარიძე.

ასპინძის მუნიციპალიტეტის გამგებლის მოადგილის ალექსანდრე პაპაშვილის განმარტებით, ამ დროისთვის ლევან ცაბაძეს ყველა დოკუმენტი ჩამოუვიდა რუსეთის ფედერაციიდან დიპლომის ნამდვილობასთან დაკავშირებით და იმ შემთხვევაში, თუ ახალციხის რაიონული სასამართლოს გადაწყვეტილება ძალაში დარჩება და ასპინძის საკრებულო ხელახალ კონკურსს გამოაცხადებს, მოქმედ გამგებელს მონაწილეობა შეეძლება.

„იმ შემთხვევაში, თუ გადაწყვეტილება ძალაში შევა, მოსარჩელე მხარეს, პაატა მაისურაძეს არანაირი შეღავათი არ აქვს, გამომდინარე იქიდან, რომ იმ ნაწილში, როდესაც უარი უთხრა საკონკურსო კომისიამ, ეს გადაწყვეტლება არ გაუსაჩივრებია. რაც შეეხება ლევან ცაბაძეს, მიიღებს თუ არა კონკურსში მონაწილეობას, მისი გადასაწყვეტი იქნება, იურიდიულად უფლება ექნება კონკურსში მონაწილობის. ყველა დოკუმენტი ჩამოსულია რუსეთიდან,რაც ამტკიცებს, რომ აღნიშნული დიპლომი ეკუთვნის ლევან ცაბაძეს“,-ამბობს ალექსანდრე პაპაშვილი.


მოსარჩელე მხარე, გამგებლობის პრეტენდენტი პაატა მაისურაძე

შეგახსენებთ, რომ გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. საკრებულოს 16 მაისს გამართულ სხდომაზე 22-ვე დეპუტატმა ლევან ცაბაძის კანდიდატურას ერთხმად დაუჭირა მხარი, რამაც ყოფილი კანდიდატების პროტესტი გამოიწვია.

[თინათინ ზაზაძე, ასპინძა]