შესაძლოა ასპინძის გამგებელი პროკურატურაში დაიბარონ

პაატა მაისურაძემ, რომელიც გამგებლობის ერთ ერთი კანდიდატი იყო სასამართლოს ჯერ ჯიდევ მაშინ მიმართა, ვიდრე ცაბაძე გამგებლად დაინიშნებოდა. მეორე საჩივარი კი მაისურაძემ ახალციხის პროკურატურაში 24 მაისს შეიტანა. იგი ახალ გამგებელს დიპლომისა და დოკუმენტების გაყალბებაში ადანაშაულებს.

”ჩვენ არ გავჩერდებით, კიდევ ერთი გაყალბება აღმოვაჩინეთ ცაბაძის შრომის წიგნაკში, სადაც არც ბეჭედია და არც ხელისმოწერა. ვიბრძოლებთ ბოლომდე და გვაქვს იმედი გამარჯვების”, - განაცხადა სატელეფონი საუბარში პაატა მაისურაძემ.

ყოფილმა კანდიდატმა დახმარების თხოვნით საქართველოს ახალგაზრდა იურისტთა ასოციაციასაც მიმართა, როგორც იგი ამბობს ასოციაციამ დახმარება აღუთქვა.

”საიამ გამოგვიყო ადვოკატები, რომლებიც სასამართლო პროცესს დაესწრებიან. ასევე გვინდა საერთაშორისო არასამთავრობო ორგანიზაციებიც ჩავრთოთ პროცესში, დარწმუნებული ვართ, რომ ჩვენს სიმართლეს დავამტკიცებთ”, - განაცხადა მაისურაძემ.

ასპინძის მუნიციპალიტეტის გამგებელი ლევან ცაბაძე ამბობს, რომ მაისურაძე მას კი არა, საკრებულოს და კომისიას უნდა ედავებოდეს, რადგან სწორედ მათი გადაწყვეტილების საფუძველზე გახდა ის გამგებლობის კანდიდატი.

”ნება მისია და არ არის პრობლემა, მე ვეცდები ჩემი სიმართლე დავამტკიცო. ეს არის დავის საგანი და კომენტარისგან თავს შევიკავებ. შეცდომები რომ იყო, ეს მეც ვიცოდი, მაგრამ, ამის გამო პრობლემა არსად შემქმნია და არ მიცდია ამის გამოსწორება. ახლა გავაგზავნი დიპლომს სათანადო ორგანოში და ვეცდები რომ გამოვასწორო”, - განაცხადა მუნიcიპალიტეტის გამგებელმა ლევან ცაბაძემ.

შეგახსენებთ, რომ გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. საკრებულოს 16 მაისს გამართულ სხდომაზე 22-ვე დეპუტატმა ლევან ცაბაძის კანდიდატურას ერთხმად დაუჭირა მხარი. რამაც ყოფილი კანდიდატების პროტესტი გამოიწვია.

ყოფილი კანდიდატები ლევან ცაბაძეს დოკუმენტების გაყალბებაში ადანაშაულებენ. სწორედ ამიტომ ყოფილმა კამდიდატის პაატა მაისურაძის მომხრეებმა 17 მაისს ასპინძის მუნიციპალიტეტის ადმინსტრაციულ შენობასთან საპროტესტო აქცია გამართეს.

[თინათინ ზაზაძე, ასპინძა]