ასპინძის საკრებულოს საქმეზე ახალციხის სასამართლოში დღეს მორიგი პროცესი გაიმართა

მოსამართლე მარიკა ჩიტაშვილის განცხადებით, 13 აგვისტოს სასამართლო პროცესი წერილობითი მტკიცებულებების გამოკვლევას და პაექრობის ეტაპს დაეთმობა. მომავალ სხდომაზე მოპასუხე მხარემ კონკურსის გამოცხადებიდან გამგებლის დანიშვნამდე ყველა დოკუმენტური მასალა უნდა წარადგინოს.

შეგახსენებთ, რომ ასპინძის მუნიციპალიტეტის გამგებლობის ყოფილმა კანდიდატმა პაატა მაისურაძემ სასამართლოში საჩივარი 24 მაისს შეიტანა. იგი ასპინძის მუნიციპალიტეტის საკრებულოს უკანონო გადაწყვეტილების გამოტანაში ადანაშაულებს. მაისურაძე აცხადებს, რომ საკონკურსო კომისიამ ტექნიკურ ხარვეზად მიიჩნია ასპინძის მუნიციპალიტეტის გამგებლის ლევან ცაბაძის უმაღლესი განათლების დამადასტურებელ დიპლომსა და შრომის წიგნაკში არსებული უზუსტობები და მისი კანდიდატურა კონკურსიდან არ მოხსნა. მაისურაძე ამბობს, რომ შეცდომაა ცაბაძის გვარსა და მამის სახელში. ასევე, დიპლომი აქვს მ.ა შოლოხოვის უნივესიტეტის სახელწოდებით და ვიდრე ეს სასწავლებელი მიიღებდა ამ სახელწოდებას, ცაბაძეს მანამდე, სამი წლით ადრე აქვს აღებული დიპლომი.

სასამართლო პროცესზე მოწმის სახით დღეს ასპინძის მუნიციპალიტეტის საკრებულოს თავმჯდომარე ალექსანდრე მელიქიძე დაიკითხა. თუმცა, მან მოსამართლისა და მოსარჩელე მხარის კითხვებს იმ მიზეზით არ უპასუხა, რომ საქმის დეტალები ვერ გაიხსენა.
მოსარჩელე პაატა მაისურაძემ დღეს სასამართლო პროცესი კომენტარის გარეშე დატოვა.

ასპინძის მუნიციპალიტეტის გამგებელი ლევან ცაბაძე, დღეს პროცესზე მესამე პირად იყო მიწვეული. პროცესს მის ნაცვლად მისი ადვოკატი დაესწრო.
„უბრალოდ შეცდომაა გაპარული დიპლომის შედგენისას. გაგზავნილია განაცხადი უნივერსიტეტში დიპლომთან ერთად, დამადასტურებელი ცნობა მოვა და შეცდომაც გასწორდება. რაც შეეხება მამის სახელს, საჯარო რეესტრიდან წარმოვადგინეთ ცნობა, რომ 1989 წელს შეიცვალა სახელი. მაგრამ, დაბადების მოწმობა და ატესტატი არის ძველ სახელზე გაცემული და იმ დოკუმენტებზე დაყრდნობით არის შევსებული დიპლომი“, - ამბობს ასპინძის მუნიციპალიტეტის გამგებლის ლევან ცაბაძის ადვოკატი ირაკლი ხაჩიძე.
მომავალი სასამართლო პროცესი 13 აგვისტოს 15:00 საათისთვის არის ჩანიშნული.
საკრებულოს წარმომადგენლის ალექსანდრე პაპაშვილის განცხადებით, ამ პერიოდში მათ სასამართლოს წინაშე მტკიცებულებების წარდგენა არ გაუჭირდებათ.

„მტკიცებულებეის წარდგენა 13 აგვისტომდეც შეგვეძლო, ჩვენთვის უკეთესია მალე დასრულდეს და სიმართლე გაირკვეს. ამის შემდეგ შეგვეძლება მივხედოთ მუნიციპალიტეტს“ , - ამბობს პაპაშვილი.

შეგახსენებთ, რომ საქმეზე გამგებლობის ყოფილი კანდიდატი ასპინძის საკრებულოს წინააღმდეგ, პირველი პროცესი 2 ივლისს გაიმართა. მაშინ ასპინძის მუნიციპალიტეტის საკრებულოს წარმომადგენლებს მოუსმინეს.

[თინათინ ზაზაძე, ახალციხე]