ასპინძის საკრებულო: ზეწოლას ადგილი არ ჰქონია

ასპინძის მუნიციპალიტეტის გამგებლობის კანდიდატები პაატა მაისურაძე და გიორგი ჯვარიძე საკრებულოს თავმჯდომარის მოადგილეს მერაბ ველიჯანაშვილსა და ფრაქცია ”ქართული ოცნების მხარდამჭერების” თავმჯდომარეს თამაზ ზედგინიძეს უკანონო გადაწყვეტილების გამოტანაში ადანაშაულებენ. მაისურაძის თქმით, ცაბაძის კანდიდატურას, რომელიც გამგებლად გუშინ აირჩიეს, ”ქართული ოცნების”რაიონული ორგანიზაციის თამჯდომარე მამუკა მელიქიძე ლობირებდა და მისი მხრიდან საკრებულოს წევრებზე ზეწოლას ჰქონდა ადგილი. გარდა ამისა, კომისიამ ყურადღება არ მიაქცია ცაბაძის დოკუმენტებში არსებულ ხარვეზს და მისი კანდიდატურა კონკურსიდან არ მოხსნა.

მერაბ ველიჯანაშვილი ამ ბრალდებას კატეგორიულად უარყოფს. მაისურაძის მოსაზრებას უსაფუძვლოს უწოდებენ თამაზ ზედგინიძე და მამუკა მელიქიძეც.

მელიქიძის განმარტებით, ლევან ცაბაძე ”ქართული ოცნების”კანდიდატია და ამიტომ, ვალდებული იყო, რეკომანდაცია გაეწია: ”არავითარი ზეწოლა არ ყოფილა არავისთან მიმართებაში. მე არ ვარ ის პიროვნება, ვინმეზე ზეწოლა განვახორციელო. რაც შეეხება დიპლომის ნამდვილობას, ვისაც ეჭვი ეპარება, შეუძლია შესაბამის სტრუქტურებში საჩივარი შეიტანოს”.

შეგახსენებთ, რომ გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. საკრებულოს 16 მაისს ჩატარებული სხდომაზე საკრებულოს 22-ვე დეპუტატმა ლევან ცაბაძის კანდიდატურას ერთხმად დაუჭირა მხარი.

გამგებლობის კანდიდატი პაატა მაისურაძე ამბობს, რომ საკრებულოს გადაწყვეტლებას გაასაჩივრებს.

”მე გამოვითხოვე ლევან ცაბაძის საქმე და მის დოკუმენტაციაში დარღვევა აღმოჩნდა. ვალდებული ვარ იმ ხალხს, რომელიც გვერდით მიდგას, მივაწოდო ის ინფორმაცია. გვინდოდა შეხვედრა გამგებელთან და საკრებულოსთან, მაგრამ არ ისურვეს. არ ვაპირებთ გაჩერებას და საჩივარს პროკურატურაში შევიტანთ. ეს ყველაფერი არის მერაბ ველიჯანაშვილის დამსახურება”, - ამბობს მაისურაძე.

როგორც საკრებულოს საპრეტენზიო კომისიაში აცხადებენ, მაისურაძემ და ჯვარიძემ კომისიას საჩივრით არაერთხელ უკვე მიმართეს.

”მაისურაძემ საჩივარი ორჯერ შემოიტანა: 10 მაისს და 14 მაისს, გიორგი ჯვარიძემ კი 13 და 16 მაისს. კომისიამ განცხადებები სამი დღის ვადაში განიხილა. ყველა ოქმის ასლი მათ უკვე გადაეცათ. ნამდვილად იკითხება საბუთებში, რომ ცაბაძის ნაცვლად იკითხება ცავაძე, მაგრამ ეს ჩაითვალა ტექნიკურ შეცდომად შევსების პერიოდში და ამის გამო ცაბაძის კანდიდატურა არ მოვხსენით”,- ამბობს საპრეტენზიო კომისიის თავმჯდომარე ალექსანდრე მელიქიძე.

მისი თქმით, მაისურაძემ საპრეტენზიო კომისიაში საჩივარი ლევან ცაბაძის მხოლოდ გვართან და საჯარო სამსახურში მუშაობის გამოცდილებასთან დაკავშირებით შეიტანა საჩივარი.

”პიროვნებას ჰქონდა საჯარო სამსახურში მუშაობის 1 წელი 11 თვე და სამი დღე, ჩვენ ჩავთვალეთ, რომ მას ჰქონდა გამოცდილება, რადგან არაკანლებ ორწლიან გამოცდილებაზე არ იყო ლაპარაკი”,- ამბობს მელიქიძე.

შეგახსენებთ, მაისურაძის მომხრეებმა დღეს ასპინძის გამგეობასთან საპროტესტო აქცია გამართეს. ისინი გამგებელთან შეხვედრას ითხოვდნენ, თუმცა, ცაბაძის გადაწყვეტილებით, შეხვედრა არ შედგა.



[თინათინ ზაზაძე, ასპინძა]