ასპინძის გამგებლად ცნობილი მორაგბე ლევან ცაბაძე აირჩიეს

გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. საკრებულოს დღევანდელ სხდომაზე 22-ვე დეპუტატმა ლევან ცაბაძის კანდიდატურას ერთხმად დაუჭირა მხარი.

ლევან ცაბაძე დაიბადა 1973 წლის 8 იანვარს, დაბა ასპინძაში. დაამთავრა ქ რუსთავის #18 საშუალო სკოლა. სკოლის დამთავრების შემდეგ ჩააბარა თბილისში ფიზკულტურის ინსტიტუტში.

”1994 წელს მომიწია ქვეყნის დატოვება, რადგან სურვილი მქონდა სპორტული კარიერა გამეგრძელებინა რუსეთში და ასე მოვხვდი მოსკოვში. საბუთები გადავიტანე იმ დროისთვის მოსკოვის პედაგოგიურ ინსტიტუტში და რადგან სხვადასხვა სასწავლებელი იყო, ერთი კურსით უკან დამსვეს. ინსტიტუტი 1997 წელს დავამთავრე”, - ამბობს ცაბაძე.

1996 წლიდან 2004 წლამდე რაგბისტის კარიერას საფრანგეთში აგრძელებდა. 1992-2004 წლებში იყო ეროვნული ნაკრების წევრი, აქედან, 2000-2002 წლებში ეროვნული ნაკრების კაპიტანი.

დაბრუნების შემდეგ დააფუძნა ფრანგულ-ქართული კომპანია ”ლეონსიო” (დაცვის ელექტრონული სისტემების, კამერების, სიგნალიზაციების დამონტაჟება). 2008-2011 წწ იყო ამ კომპანიის გენერალური დირექტორი.

2011 წელს მუშაობა დაიწყო თავდაცვის სამინისტროში, სპორტის ინსპეტქორის თანამდებობაზე. მიმდინარე წელს თანამდებობა პირადი განცხადების საფუძველზე დატოვა.

”სამსახურიდან წამოვედი იმის გამო, რომ ასპინძაში ვაპირებდი მოღვაწეობას”, - ამბობს იგი.

შეგახსენებთ, რომ ასპინძის მუნიციპალიტეტის გამგებლის თანამდებობა მას შემდეგ გახდა ვაკანტური, რაც ყოფილმა გამგებელმა, ბესიკ ბექაურმა სამსახურიდან წასვლის შესახებ, განცხადება დაწერა. ბექაურის განცხადება საკრებულოში 18 აპრილს შევიდა. დაკავებული თანამდებობიდან წასვლის მიზეზად ბექაურმა შექმნილი პოლიტიკური სიტუაცია დაასახელა. გამგებლის ვაკანსიაზე საკრებულომ 8 განაცხადი მიიღო. ამათგან, ხუთმა არასრული დოკუმენტაციის წარდგენის გამო კონკურსის პირველი ეტაპი ვერ გადალახა.

[თინათინ ზაზაძე, ასპინძა]