ახალციხეში, საბარგო სადგურზე გზის მშენებლობა დაიწყო

„ჩვენი პროტესტის შემდეგ მოიყვანეს ტრაქტორი, გათხარეს გზა და კანალიზაციის ცენტრალურ მილზე დაერთებები დაასრულეს. ბუნებრივია, ეზოებამდე მისაყვანი მილები ჩვენი ხარჯებით ვიყიდეთ“, – ამბობენ ადგილობრივები.

საკანალიზაციო ქსელის მშენებლობის დასრულების შემდეგ საბარგო სადგურზე ბორჯომის, აღმაშენებლის, აბასთუმნის, ჭონქაძის, გიორგი ბრწყინვალესა და ტაბიძის ქუჩებზე ასფალტის დაგება დაიწყო.

სამუშაოებს ტენდერში გამარჯვებული სამშენებლო კომპანია „მესხეთ ავტოგზა“ ასრულებს. მშენებლობისთვის რეგიონებში განსახორციელებელი პროექტების ფონდიდან და ადგილობრივი ბიუჯეტიდან 1 357 777 ლარი გამოიყო.

შეგახსენებთ, რომ საბარგო სადგურზე საკანალიზაციო ქსელის მშენებლობას წინ არა ერთი საპროტესტო აქცია უძღვოდა.

[sknews.ge]