საბარგო სადგურზე გზის მოასფალტება იწყება

საბარგო სადგურზე ბორჯომის, აღმაშენებლის, აბასთუმანის, ჭონქაძეს, გიორგი ბრწყინვალესა და ტაბიძეს ქუჩები მოასფალტდება. თუმცა მანამდე აღნიშნულ დასახლებაში საკანალიზაციო სისტემის მშენებლობა უნდა დასრულდეს.

საკანალიზაციო სისტემას „საქართველოს გაერთიანებული წყალმომარაგების კომპანიის“ მიერ გამოცხადებულ ტენდერში გამარჯვებული შპს „ვი–აი–პი“ აკეთებს. კომპანიამ სამუშაოები გასული წლის სექტემბერში დაიწყო და ხუთი თვის ვადაში უნდა დაესრულებინა, თუმცა, პროექტში ცვლილებები შევიდა და მშენებლობა აპრილში დასრულდება. აღნიშნული პროექტის ღირებულება 894 849 ლარია. ამ თანხით მოეწყობა 5.9 კმ. სიგრძის წყალარინების ქსელი.

რაც შეეხება ქუჩების მოასფალტებას, ტენდერში წინადადებების მიღება 17 მარტიდან დაიწყება და 22 მარტს დასრულდება. სამუშაოები ხელშეკრულების გაფორმებიდან ხუთი თვის ვადაში უნდა დასრულდეს. ქუჩების მოასფალტებისთვის 1 474 746 ლარი რეგიონებში განსახორციელებელი პროექტების ფონდიდან გამოიყოფა.

შეგახსენებთ, რომ საბარგო სადგურის დასახლების მცხოვრებლები ადგილობრივი ხელისუფლებისუფლებისგან წლებია ითხოვენ საკანალიზაციო ქსელის მოწყობას და შიდა ქუჩების მოასფალტებას. ადგილობრვებმა პროტეტსტის ნიშნად გასული წლის 8 ივნისს ახალციხე–თბილისის ცენტრალური გზა გადაკეტეს.







[თინათინ ზაზაძე, ახალციხე]