საბარგოზე საკანალიზაციო ქსელი გააკეთეს, თუმცა ფეკალიები ისევ გზაზე მოედინება

ახალციხეში, საბარგო სადგურზე მცხოვრებლები ამბობენ, რომ მშენებელმა კომპანიამ დასახლებაში მხოლოდ ცენტრალური მილები გაიყვანა: „ასე დატოვეს და წავიდნენ, ვერ გეტყვით რა იქნება. ჯერ გვითხრეს ეზოებამდე მოგიყვანთ და მერე სახლებში თქვენ შეიყვანეთო, ახლა ამბობენ 200–300 ლარი უნდა გადაიხადოს თითო ოჯახმა, რომ დაერთების ნებართვა მიიღოთო. ყველას ხომ არ აქვს ამხელა თანხის გადახდის საშულება?! გამოდის რომ ისევ საკანალიზაციო ქსელის გარეშე ვრჩებით“.

„საქართველოს გაერთიანებული წყალმომარაგების კომპანიაში“ აცხადებენ, რომ ტენდერში გამარჯვებულ შპს „ვი–აი–პის“ მხოლოდ ცენტრალური საკანალიზაციო სისტემის გაყვანა ევალებოდა. მოსახლეობის სისტემის ცენტრალურ ქსელზე დაერთებისთვის კი ახალი ტენდერი უნდა გამოაცხადონ. თუმცა, კომპანიას ეს საკითხი თავიდანვე არ გაუთვალისწინებია, ამ დროისთვის ისიც კი არაა გადაწყვეტილი დაერთების სამუშაოებს თვითმმართველობა განახორციელებს თუ "წყალმომარაგება".

„ამ ეტაპზე დასრულებულია წყალანირების ქსელის მოწყობის სამუშაოები, დარჩენილია დაერთებები. ახლა ახალციხის მუნიციპალიტეტის ხელმძღვანელობასთან მიმდინარეობს მოლაპარაკებები, თუ ვინ აიღებს ვალდებულებას მოსახლოების დაერთების სამუშაოებზე. უახლოეს დღეებში გადაწყდება წყალმომარაგების კომპანია დააფინანსებს ამ დაერთებებს თუ თვითმმართველობა“, – ამბობს „საქართველოს გაერთიანებული წყალმომარაგების კომპანიის“ ტექნიკური აქტივების მართვის დეპარტამენტის უფროსი მიშა თათარაძე.

მისი თქმით, მას შემდეგ რაც ეს საკითხი გადაწყდება სამუშაოების შესასრულებლად ტენდერი გამოცხადდება: „დაახლოებით ორი თვის საქმეა დარჩენილი და წლის ბოლომდე მოესწრება“.



შეგახსენებთ, რომ საბარგო სადგურზე საკანალიზაციო სისტემას „საქართველოს გაერთიანებული წყალმომარაგების კომპანიის“ მიერ გამოცხადებულ ტენდერში გამარჯვებული შპს „ვი–აი–პი“ აკეთებდა. კომპანიამ სამუშაოები გასული წლის სექტემბერში დაიწყო და აპრილში დაასრულა. სამუშაოებისთვის 894 849 ლარი დაიხარჯა. ამ თანხით მოეწყო 5.9 კმ. სიგრძის წყალარინების ქსელი.

საკანალიზაციო სისტემის მოწყობის დასრულების შემდეგ დასახლებაში ასფალტის დაგება დაიწყება.

აღნიშნულისთვის რეგიონებში განსახორციელებელი პროექტების ფონდიდან 1 474 746 ლარია გათვალისწინებული.



[თინათინ ზაზაძე, ახალციხე]