საბარგო სადგურზე საკანალიზაციო ქსელის მშენებლობა განახლდა

საბარგო სადგურზე ცენტრალური საკანალიზაციო სისტემის მშენებლობა აპრილში დასრულდა და ამ დრომდე გაურკვეველი იყო თუ ვინ მიიყვანდა ადგილობრივების სახლებამდე სისტემას, ახალციხის მერია თუ წყალმომარაგების კომპანია. გაურკვევლობა და სამუშაოების დროში გაჭიანურება იქ მცხოვრებლების პროტესტს იწვევდა, ადგილობრივები გზის გადაკეტვიაც იმუქრებოდნენ.

საბოლოოდ, ახალციხის მერია და წყალმომარაგების კომპანია შეთანხმდნენ, რომ დაქსელვას ერთობლივად უზრუნველყოფენ.

„რამდენიმე დღეა დაიწყო სამუშაოები, ტრაქტორი ჭრის არხს, ჩვენ კიდევ ვიყიდეთ მილები და ჩვენ სახლებამდე ვაერთებთ. ამას ვითხოვდით, სხვა არაფერი გვინდოდა, აქამდეც რომ დაეწყოთ მუშაობა, ამდენი ხანი გზა ასე ანგრეული არ იქნებოდა“, – ამბობს საბარგო სადგურზე მცხოვრები ბადრი სამსონიძე.

შეგახსენებთ, რომ საბარგო სადგურზე საკანალიზაციო სისტემას „საქართველოს გაერთიანებული წყალმომარაგების კომპანიის“ მიერ გამოცხადებულ ტენდერში გამარჯვებული შპს „ვი–აი–პი“ აკეთებდა. კომპანიამ სამუშაოები გასული წლის სექტემბერში დაიწყო და აპრილში დაასრულა. სამუშაოებისთვის 894 849 ლარი დაიხარჯა. ამ თანხით მოეწყო 5.9 კმ. სიგრძის წყალარინების ქსელი.



[ლუბა გიორგაძე, ახალციხე]