საბარგო სადგურზე საკანალიზაციო ქსელის მშენებლობა სექტემბრიდან დაიწყება

საბარგო სადგურზე საკანალიზაციო ქსელის მშენებლობისთვის ტენდერი შპს „ვი–აი–პიმ“ მოიგო. საქართველოს გაერთიანებული წყალმომარაგების კომპანია დასახლებაში ქსელის მოსაწყობად ტენდერს 1 076 573 ლარზე აცხადებდა. „ვი–აი–პიმ“ კი 826 403 ლარით გაიმარჯვა.

„თანხა 20 პროცენტზე ნაკლები გვაქვს. ამიტომ ექსპერტიზით თანხის ადექვატურობა, ანუ ის უნდა დადასტურდეს, რომ ამ თანხით სამუშაოების შესრულება შესაძლებელია“, – აცხადებს შპს „ვი–აი–პიში“ შესყიდვების მენეჯერი დავით დანელია.

მისი თქმით, ხელშეკრულების გაფორმებამდე სხვა ფორმალური საკითხებიცაა მოსაგვარებელი: „შესრულების უზრუნველყოფის საბანკო გარანტია გვექნება ასევე დამკვეთთან წარსადგენი“.

დავით დანელია აცხადებს, რომ აგვისტოს ბოლომდე ყველა ეს საკითხი მოგვარდება, ამის შემდეგ ხელშეკრულება გაფორმდება და შესაბამისად, ქსელის მშენებლობა სექტემრიდან დაიწყება.

საბარგო სადგურზე სამშენებლო სამუშაოები, გამარჯვებულ კომპანიასთან ხელშეკრულების გაფორმებიდან არაუმეტეს ხუთ თვეში დასრულდება.

შესრულებული სამუშაოების საგარანტიო ვადად კი არანაკლებ 1 წელია მითითებული, თუმცა ეს ვადა საბოლოო მიღება–ჩაბარების აქტის გაფორმებიდან აითვლება.

შეგახსენებთ, ახალციხეში, საბარგო სადგურზე მცხოვრებლები წლებია დასახლებაში საკანალიზაციო ქსელი მოწყობას ითხოვენ. მათ პროტესტის უკიდურეს ფორმას მიმართეს და ახალციხის შემოსასვლელში თბილისი – ახალციხის ცენტრალური მაგისტრალი გადაკეტეს. აქ საკანალიზაციო ქსელის მოწყობაზე მთავრობამ გადაწყვეტილება სწორედ ამის შემდეგ მიიღო.

[თამუნა უჩიძე, ახალციხე]