როდის დაიწყება საბარგო სადგურზე საკანალიზაციო ქსელის მშენებლობა

„საქართველოს გაერთიანებული წყალმომარაგების კომპანიამ“ საბარგო სადგურის დასახლების ზედა ნაწილში, სამეურნეო ფეკალური წყალარინების ქსელის სამშენებლო სამუშაოების შესასრულებლად ტენდერი 27 ივნისს გამოაცხადა.

სატენდერო დოკუმენტების მიხედვით, შესყიდვის ობიექტის სავარაუდო ღირებულება 1 076 573 ლარია. აღნიშნული თანხის მოძიება და წყალმომარაგების კომპანიისთვის მისი გადაცემა რეგიონული განვითარებისა და ინფრასტრუქტურის სამინისტროს საქართველოს მთავრობის განკარგულებით (N1224 ) ტენდერის გამოცხადებამდე, 15 ივნისს დაევალა.

ტენდერში წინადადებების მიღება დასრულდა, თუმცა ჯერ გამარჯვებული არ გამოვლენილა.

საბარგო სადგურზე სამშენებლო სამუშაოები, გამარჯვებულ კომპანიასთან ხელშეკრულების გაფორმებიდან არამუმეტეს ხუთ თვეში დასრულდება.

შესრულებული სამუშაოების საგარანტიო ვადად კი არანაკლებ 1 წელია მითითებული, თუმცა ეს ვადა საბოლოო მიღება ჩაბარების აქტის გაფორმებიდან აითვლება.

შეგახსენებთ, ახალციხეში, საბარგო სადგურზე მცხოვრებლები წლებია დასახლებაში საკანალიზაციო ქსელი მოწყობას ითხივენ. მათ პროტესტის უკიდურეს ფორმას მიმართეს და ახალციხის შემოსასვლელში თბილისი – ახალციხის ცენტრალური მაგისტრალი გადაკეტეს. აქ საკანალიზაციო ქსელის მოწყობაზე მთავრობამ გადაწყვეტილება სწორედ ამის შემდეგ მიიღო.

[sknews.ge]