საბარგო სადგურზე საკანალიზაციო ქსელის მშენებლობა დაიწყო

საქართველოს გაერთიანებული წყალმომარაგების კომპანიასა და შპს „ვი–აი–პის“ შორის ხელშეკრულება 9 სექტემბერს გაფორმდა. როგორც მშენებელ კომპანიაში აცხადებენ, საბარგო სადგურზე მუშაობა უკვე დაიწყეს.

შეგახსენებთ, რომ საქართველოს გაერთიანებული წყალმომარაგების კომპანია დასახლებაში ქსელის მოსაწყობად ტენდერს 1 076 573 ლარზე აცხადებდა. „ვი–აი–პიმ“ კი 826 403 ლარით გაიმარჯვა. მან ხელშეკრულების მიხედვით სამშენებლო სამუშაოები ხუთ თვეში უნდა დაასრულოს.

ახალციხეში, საბარგო სადგურზე მცხოვრებლები წლებია დასახლებაში საკანალიზაციო ქსელი მოწყობას ითხოვენ. მათ პროტესტის უკიდურეს ფორმას მიმართეს და ახალციხის შემოსასვლელში თბილისი – ახალციხის ცენტრალური მაგისტრალი გადაკეტეს. აქ საკანალიზაციო ქსელის მოწყობაზე მთავრობამ გადაწყვეტილება სწორედ ამის შემდეგ მიიღო.

[თამუნა უჩიძე, ახალციხე]