ძლიერმა წვიმამ უსახურავო კორპუსი ისევ ჩარეცხა

მთავარი → საზოგადოება 14.06.2013

ასპინძის ქუჩაზე, 28-ე კორპუსში მცხოვრებლები, რომელსაც 23 აპრილის შემდეგ სახურავი არ აქვს, დღეს, 14 ივნისს მოსულმა წვიმამ ორმაგად დააზარალა, წყალი ოთახებშიც ჩავიდა და სარდაფებშიც შევარდა.

ძლიერმა წვიმამ უსახურავო კორპუსი ისევ ჩარეცხა

”ვის აღარ მივმართეთ, მაგრამ ამ დრომდე შედეგი არ არის, ყოველი წვიმის დროს ტაშტები აგვაქვს ჭერში წვიმა რომ არ ჩამოვიდეს, მაგრამ მაინც ჩამოდის. ნახეთ რა დღეშია კედლები”, - ამბობს კახა ლომიძე.

ლომიძეს იმედი აქვს, რომ მალე კორპუსსაც გადახურავენ და დაზარალებულებს კომპენსაციასაც მისცემენ: ”თუ დროზე არ მოგვხედეს, ჩვენ სხვა გზებს მივმართავთ, ხალხი აქციებს გამართავს. ჯერ კიდევ თავს ვიკავებთ, იქნებ ყურადღება მოგვაქციონ”, - ამბობს ლომიძე.

დღეს, ძლიერმა წვიმამ, 28-ე კორპუსის სარდაფებიც დატბორა.

”წყალი აღარ გავიდა სანიაღვრე არხში და სარდაფებში ჩავიდა. რაც შეგვიძლია ჩვენი სახსრებით, იმას ვაკეთებთ. ჩვენი პატრონი მაინც არავინ არ არის”,-ამბობს მიხეილ მანუკიანი.

შეგახსენებთ, რომ მიმდინარე წლის 23 აპრილს, ძლიერმა ქარმა საცხოვრებელ კორპუსს ეგრეთ წოდებული, ”პრეზიდენტის წითელი სახურავი” მთლიანად მოგლიჯა.საცხოვრებელ კორპუსს სახურავი ამ დრომდე არ აქვს. გასულ კვირას გაირკვა, რომ კორპუსს გამგეობა გადახურავს.

[ნუკა სტეფნაძე, ახალციხე]