ბორჯომის პოლიციის ყოფილ უფროსს დღეს განაჩენს გამოუტანენ?

აქცია და ბოლო, ან ბოლოს წინა სასამართლო პროცესი პარალელურად მიმდინარეობს. ბორჯომელი მოქალაქეები ტრანსფარანტებით - „დაისაჯონ ცოცხოსნები“, „დამნაშავეები ციხეში“ - სასამართლოს წინ დგანან.

„ეს ადამიანები წლების განმავლობაში ძალადობდნენ მოქალაქეებზე. მათ ყველაფერთან ერთად ახალგაზრდა ბიჭი გააუპატიურეს. ვითხოვთ, სათანადოდ დაისაჯოს ხვედელიანი. იმედი გვაქვს, სასამართლო სამართლიან განაჩენს გამოიტანს“,-ამბობს ბორჯომელი ზურაბ ხაჩიძე.

ისევე როგორც სასამართლოს შენობის გარეთ, უჩვეულოდ ბევრი ადამიანია დღეს სასამართლოს დარბაზშიც. განსაკუთრებით მობილიზებულია დაცვა. სასამართლოს მანდატურებთან ერთად, სასამართლოს მიმდებარე ტერიტორიასა და დარბაზში, წესრიგს იცავს პოლიციაც.

ხვედელიანის საქმესთან დაკავშირებით სასამართლომ როგორც ბრალდების, ასევე დაცვის მხარის მტკიცებულებების გამოკვლევა დაასრულა. დღეს ბოლო ან ბოლოს წინა პროცესი იმართება. სასამართლოს გადაწყვეტილებით პროცესი დახურულია. იმ შემთხვევაში, თუ დღეს მოსამართლე განაჩენს გამოიტანს, გადაწყვეტილების წაკითხვისას პროცესი ღია იქნება.

„სამხრეთის კარიბჭე“ პროცესის ღია ნაწილს დაესწრება და სასამართლოს გადაწყვეტილების შესახებ დღის ბოლომდე შეგატყობინებთ.

შეგახსენებთ, ეს პირველი შემთხვევა არაა, როცა ბორჯომის პოლიციის ყოფილი უფროსის დასჯის მოთხოვნით აქცია იმართება. სასამართლო პროცესის პარალელურად ბორჯომის მცხოვრებლებმა აქცია 20 მარტსაც გაიმართეს.

ხვედელიანი, 2012 წლის 30 ნოემბერს, სამცხე-ჯავახეთის საოლქო პროკურატურისა და შს მთავარი სამმართველოს თანამშრომლებმა, თბილისში დააკავეს. ხვედელიანი წლების განამვლობაში მუშაობდა ბორჯომის შს სამმართველოს უფროსის თანამდებობაზე. 2012 წლის საპარლამენტო არჩევნებში კი ”ნაციონალური მოძრაობიდან” ბორჯომის მაჟორიტარ დეპუტატად იყო წარდგენილი. ხვედელიანს ბრალი ბრალი სისხლის სამართლის კოდექსის 144 /2 ა. ბ.ე, 143/ 3 ა, 333/ 3, ბ გ 147 / 1 და 148 მუხლებით ედება. მისი სასამართლო პროცესები მიმდინარე წლის თებერვლიდან მიმდინარეობს.

[sknews.ge]