ბორჯომის პოლიციის ყოფილი უფროსის საქმეში მტკიცებულებებს იკვლევენ

მთავარი → სამართალი 20.03.2013

საპროტესტო აქციის ფონზე მიმდინარე, ბორჯომის პოლიციის ყოფილი უფროსის, მამუკა ხვედელიანის სასამართლო პროცესზე დღეს მოწმეები დაკითხეს.

ბორჯომის პოლიციის ყოფილი უფროსის საქმეში მტკიცებულებებს იკვლევენ

სასამართლო პროცესი თითქმის ხუთი საათის განმავლობაში მიმდინარეობდა. პროცესის დასრულების შემდეგ, ხვედელიანის ადვოკატმა, გიორგი ჭალიძემ განაცხადა, რომ ამ ეტაპზე მტკიცებულებების მოკვლევა მიმდინარეობს.

”ბრალი სამი მუხლით აქვს წაყენებული. ერთ-ერთი მუხლი ექვსიდან თორმეტ წლამდე თავისუფლების აღკვეთას ითვალისწინებს, დანარჩენი - ოთხიდან რვა წლამდე. პროკურატურა რაღაც არ არსებულ მუხლებს ედავება, ბოლოს გამომჟღავნდება ყველაფერი. პროცესი გადაიდო, ვინაიდან მოწმეები კიდევ დასაკითხია. ფაქტობრივად, დაზარალებულების დაკითხვა უკვე დასრულდა, მოწმეების გამოკითხვა გრძელდება”, - განაცხადა გიორგი ჭალიძემ.

შეგახსენებთ, რომ ბორჯომის პოლიციის ყოფილი უფროსის სასამართლო პროცესი დღეს, 12 საათზე დაიწყო. პროცესის პარალელურად ახალციხის რაიონულ სასამართლოსთან აქცია იმართებოდა. აქციის მონაწილეები მამუკა ხვედელიანისთვის სამართლიანი განაჩენის გამოტანას ითხოვდნენ.

ახალციხის რაიონულ სასამართლოში მამუკა ხვედელიანის მომდევნო პროცესი 29 მარტისთვის ჩაინიშნა.

[თამარ თოთაძე, ახალციხე]