ბორჯომელები პოლიციის ყოფილი უფროსის დასჯას ითხოვენ [Video]

აქციის მონაწილეები ბორჯომის პოლიციის ყოფილი უფროსის მამუკა ხვედელიანისთვის სამართლიანი განაჩენის გამოტანას ითხოვენ.

”მკაცრი განაჩენი ყველა იმ ჯალათს, ვინც ასე ”გამოჩეკა” ვანო მერაბიშვილმა და მისმა ხროვამ, რომლებმაც ხალხის წინაშე დანაშაული ჩაიდინეს. იმედი გვაქვს რომ სამართლიანობა აღდგება, წინააღმდეგ შემთხვევაში ეს პროცესი გაგრძელდება”, - ამბობს აქციის ერთ-ერთი მონაწილე, არასამთავრობო ორგანიზაცია ”ერთსულოვნება საზოგადოების უფლებებისთვის” ახალციხის რაიონული ორგანიზაციის თავმჯდომარე გუჯა ბიჭაშვილი.

აქციის მონაწილეები ამბობენ, რომ ყველა დამნაშავე სამართლიანად უნდა დაისაჯოს.

”ჩვენი მოთხოვნაა კანონს ამოფარებული ადამიანები, რომლებიც ძალადობას სჩადიოდნენ, სათანადოდ დაისაჯონ. მოვითხოვთ სათანადო განაჩენს სასამართლოსგან”, - ამბობს აქციის ერთ-ერთი მონაწილე, ”ქართული ოცნების” ბორჯომის რაიონული ორგანიციის თავმჯდომარის მოადგილე ზურა ხაჩიძე.



აქცია ხვედელიანის სასამართლო პროცესის პარალელურად მიმდინარეობს. სასამართლო პროცესი რომელიც 12 საათზე დაიწყო და ჯერ არ დასრულებულა.

ხვედელიანს ბრალი სისხლის სამართლის კოდექსის 144 /2 ა. ბ.ე, 143/ 3 ა, 333/ 3, ბ გ 147 / 1 და 148 მუხლებით ედება.

შეგახსნებთ, რომ ხვედელიანი, 2012 წლის 30 ნოემბერს, სამცხე-ჯავახეთის საოლქო პროკურატურისა და შს მთავარი სამმართველოს თანამშრომლებმა, თბილისში დააკავეს. ხვედელიანი წლების განმავლობაში მუშაობდა ბორჯომის შს სამმართველოს უფროსის თანამდებობაზე. 2012 წლის საპარლამენტო არჩევნებში კი ”ნაციონალური მოძრაობიდან” ბორჯომის მაჟორიტარ დეპუტატად იყო წარდგენილი.

შეგახსენებთ, რომ მამუკა ხვედელიანის სასამართლო პროცესები უკვე რამდენიმე თვეა მიმდინარეობს. სხდომა ყოველთვის დახურულია.

სასამართლოს შენობასთან იმყოფება ”სამხრეთის კარიბჭეც”. ამ თემაზე ვრცელ მასალას მოგვიანებით შემოგთავაზებთ.



[თამარ თოთაძე, ახალციხე]