ახალციხის სასამართლოში დღეს ბორჯომის პოლიციის ყოფილ უფროსს დაკითხავენ

ხვედელიანის პროცესზე ბრალდებულებს დაკითხავენ. გიორგი ბლიაძემ, სერგო სამსონიძემ და ალექსანდრე ბლიაძემ სასამართლოს ჩვენება გასულ კვირას მისცეს. დღეს კი მამუკა ხვედელიანსა და გიორგი ლომიძეს დაკითხავენ.

ბრალდებულების ადვოკატების განცხადებით, ბლიაძეებმა და სამსონიძემ თავი დამნაშავედ არ სცნეს და განაცხადეს, რომ ჩვენებები პროკურატურას ზეწოლის შედეგად მისცეს.

სასამართლო პროცესზე იმყოფება ”სამხრეთის კარიბჭეც”. რას იტყვიან დღეს პროცესზე ხვედელიანი და ბლიაძე, ამის შესახებ პროცესის დამთავრებისთანავე მოგითხრობთ.

შეგახსენებთ, რომ მამუკა ხვედელიანისა და მისი თანამშრომლების საქმის შესახებ ახალციხის რაიონული სასამართლო მტკიცებულებებს რამდენიმე თვეა იკვლევს. ამ ხნის განმავლობაში არაერთი პროცესი გაიმართა, მათ შორის, იყო დახურული პროცესებიც. ერთ-ერთი პროცესი კი აქციების ფონზე მიმდინარეობდა. ბორჯომში მცხოვრებლები ხვედელიანის დასჯას ითხოვდნენ.

მამუკა ხვედელიანს, ალექსანდრე ბლიაძეს, სერგო სამსონიძეს, გიორგი ბლიაძესა და გიორგი ლომიძეს ბრალი ედებათ დამამცირებელ და არაადამიანურ მოპყრობაში. კერძოდ, ხვედელიანს ბრალი სისხლის სამართლის კოდექსის 144 /2 ა. ბ.ე, 143/ 3 ა, 333/ 3, ბ გ 147 / 1 და 148 მუხლებით ედება. ხვედელიანი, 2012 წლის 30 ნოემბერს, სამცხე-ჯავახეთის საოლქო პროკურატურისა და შს მთავარი სამმართველოს თანამშრომლებმა, თბილისში დააკავეს. იგი წლების განმავლობაში მუშაობდა ბორჯომის შს სამმართველოს უფროსის თანამდებობაზე. 2012 წლის საპარლამენტო არჩევნებში კი ”ნაციონალური მოძრაობიდან” ბორჯომის მაჟორიტარ დეპუტატად იყო წარდგენილი.

დაზარალებული ახალგაზრდა მამაკაცი ამბობს, რომ ხვედელიანის ბრძანებით, იგი ცემეს, სკამის ფეხით გააუპატიურეს და ფოტოები გადაუღეს.

[sknews.ge]