ბორჯომის საკრებულო ბიუჯეტის განხილვას იწყებს

ზაზა ჩაჩანიძე თანაგუნდელებთან ერთად ბორჯომის საკრებულოში დღეს შუადღეს მივიდა. მან გუშინ, 20 ნოემბერს გამართული საკრებულოს სხდომის დოკუმენტები საკრებულოს აპარატს გადასცა.

„საკრებულოს ლეგიტიმაციის შესახებ ყველა დოკუმენტი გადავეცი აპარატს. ეს არის ჩემი, ასევე, ჩემი მოადგილის და კომისიების თავმჯდომარეების არჩევის შესახებ მასალები. ასევე, ფრაქციების რეგისტრაციის შესახებ დოკუმენტები“, – ამბობს ჩაჩანიძე.

მან უკვე საკრებულოს მომავალი სხდომაც დანიშნა. დეპუტატები ხვალ, 15:00 საათზე შეიკრიბებიან.

„ბიუჯეტი საკრებულოში უკვე შემოსულია, ხვალ ბიუჯეტის განხილვას დავიწყებთ. მას ხალხს გავაცნობთ და შენიშვნებს მოვისმენთ“, – აცხადებს ჩაჩანიძე.

„ქართული ოცნების“ დეპუტატები ბორჯომის საკრებულოს ლეგიტიმურად არ ცნობენ, შესაბამისად, არც ხვალ დანიშნულ სხდომაზე აპირებენ მისვლას.

„არაკანონიერ ქმედებაში მონაწილეობას არ მივიღებთ. ეს საკრებულო იგივეა, სადმე 20 კაცი რომ შეიკრიბოს და რაღაცა სხდომა ჩაატაროს. ხვალინდელ სხდომაზე პირადად მე არ მივალ“, – აცხადებს „ქართული ოცნების“ დეპუტატი ირაკლი კვირკველია.

ბორჯომის საკრებულოს, რომელიც მხოლოდ ოპოზიციური პარტიების დეპუტატების მიერ დაკომპლექტდა, არალეგიტიმურს უწოდებს ბორჯომის ახლად არჩეული მერი ლევან ლიპარტია: „ამას სასამართლოც არ უნდა, ეს სხდომა არალეგიტიმური იყო“.

არ ეთანხმება ოპონენტებს ჩაჩანიძე: „კოდექსითაც და რეგლამენტითაც ყველაფერი წესების დაცვით ჩატარდა. არაფერი დარღვეულა. თუ არ იციან კანონი, ჩაიხედონ და წაიკითხონ მაინც“.

ცენტრალურ საარჩევნო კომისიაში აცხადებენ, რომ საკრებულოს ლეგიტიმაციის საკითხის განსაზღვრა მათი გადასაწყვეტი არ არის: „საარჩევნო ადმინისტრაციის კომპეტენცია არაა იმის შეფასება საკრებულო ლეგიტიმურია თუ არა. თუ ზოგადად არალეგიტიმურობის საკითხი დადგება დღის წესრიგში, ჩვენ მომავალ საკრებულო სხდომას სწორედ ამის შემდეგ განვსაზღვრავთ“.

თვთმმართველობის ექსპერტებისა და იურისტების თქმით, იქიდან გამომდინარე, რომ სხდომა სიითი უმრავლესობის ნახევარზე მეტმა ჩაატარა, ლეგიტიმურია. კანონის მიხედვით სიითი შემადგენლობის ნახევარზე მეტის მიერ როგორც საკრებულოს ასევე კომისიების თავმჯდომარეების არჩევა, კანონიერია.

შეგახსენებთ, რომ გუშინ 20 ნოემბერს ბორჯომის საკრებულოს პირველი სხდომა შვიდ საათზე მეტ ხანს ხმაურისა და დაპირისპირების ფონზე მიმდინარეობდა. სხდომა „ოცნების“ 13–მა დეპუტატმა დატოვა, დარჩენილმა 15–მა დეპუტატმა კი თავმჯდომარე, მისი მაოდგილე და ასევე კომისიეების თავმჯდომარეები აირჩია.

[თამუნა უჩიძე, ბორჯომი]