ასპინძის გამგებელი აქციის მონაწილეებს არ შეხვდა

ასპინძის მუნიციპალიტეტის გემგეობასთან დღეს დილიდან 30-მდე ადამიანი იყო შეკრებილი. ისინი გამგეობის შენობაში შესვლას და გამგებელთან, ლევან ცაბაძესთან შეხვედრას ითხოვდნენ. შეხვედრა არ შედგა.

შეგახსენებთ, რომ დღეს გამგეობასთან აქცია გამგებლობის ერთ-ერთი პრედენდენტის პაატა მაისურაძის მხარდამჭერებმა გამართეს. ისინი უნდობლობას უცხადებენ მუნიციპალიტეტის გუშინ დანიშნულ გამგებელს. აქტივისტები ცაბაძეს დიპლომის გაყალბებაში ადანაშაულებენ. გარდა ამისა, მაისურაძის მხარდამჭერები აცხადებენ, რომ გამგებელი საკრებულომ ზეწოლის შედეგად აირჩია.

პაატა მაისურაძე აცხადებს, რომ ვინაიდან აქციის მონაწილეებს გამგებელი არ შეხვდა და დოკუმენტებთან დაკავშირებულ კითხვებზე პასუხები ვერ მიიღეს, საქმე სასამართლოში გადაინაცვლებს.

ლევან ცაბაძე კი ამბობს, რომ აქციის მონაწილეებთან სალაპარაკო არაფერი ჰქონდა და მათ მიღებაზე უარი ამიტომ განაცხადა: ”საბუთებთან დაკავშირებით ტექნიკური ხარვეზი იყო, აუხსნეს, მაგრამ არ ესმით. შეუძლიათ მიმართონ სასამართლოს”.

[sknews.ge]