ასპინძაში საპროტესტო აქციის მონაწილეები გამგებელთან შეხვედრას ითხოვენ

ასპინძის მუნიციპალიტეტის გამგეობასთან შეკრებილი სოფელ რუსთავის მცხოვრებლები სოფელში წყლის დაწყვეტის საკითხთან დაკავშირებით ასპინძის მუნიციპალიტეტის გამგებელთან ლევან ცაბაძესთან შეხვედრას ითხოვენ.

„სოფელში 4 წყარო უკვე სულ გაქრა. ძალიან მალე წვეთი წყალი აღარ გვექნება. გამგებლის მოადგილე მერაბ ველიჯანაშვილი დაგვპირდა, რომ კომისიას შექმნიდნენ, რომელიც სოფელში წყლის დებეტის მოძიებაზე იმუშავებდა, მაგრამ ამ დრომდე არც კომისია შექმნილა და არც არაფერი შეცვლილა“, – ამბობს აქციის ერთ–ერთი მონაწილე გიორგი წიკლაური.

ადგილობრივები იმ შემთხვევაში თუ მათ ყურადღებას არ მიაქცევენ და სოფელში წყლის პრობლემა არ მოგვარდება საპროტესტო აქციებს თბილისში, მთავრობის კანცელარიასთანაც გამართავენ: „ასპინძის გზას კი გადავკეტავთ. ეს ტურისტული მონაკვეთია, გზაზე დავწვებით და არაფერს გავატარებთ“.

აქციის მონაწილეების განცხადებით, მათ „მტკვარი ჰესის“ ადმინისტრაციის წარმომადგენლები არ ხვდებიან, შესაბამსიად კომპანიის პოზიცია წყლის პრობლემასთან დაკავშირებით არ იციან: „ამიტომ გვინდა, რომ გამგებელს ვთხოვოთ აწარმოოს მოლაპარაკება ჰესის ადმინისტრაციასთან და გაგვარკვიოს ჩვენც რას გვიპირებენ“.

აქცია ასპინძის გამგეობის წინ დაახლოებით საათზე მეტია რაც იმართება, თუმცა მის მონაწილეებთან გამგებელი ლევან ცაბაძე ამ დრომდე არ გამოჩენილა. ადმინისტრაციაში აცხადებენ, რომ გამგებელი თბილისშია: „მოადგილე ალექსანდრე პაპაშვილი ახალციხეში შეხვედრაზეა, მაგრამ მან უკვე დატოვა შეხვედრა და ასპინძისკენ მოემართება“.

ვიდრე გამგებლის მოადგილე აქციის მონაწილეებთან მივა, მათ ასპინძის მუნიციალიტეტის გამგეობაში შეიტანეს წერილი, რომლის თანახმადაც ადგილობრივები გამგეობას წყლის პრობლემების მოგვარებას სთხოვენ.

შეგახსენებთ, რომ სოფელ რუსთავის მოსახლეობას მესამე თვეა სასმელი წყალი არ აქვს. ადგილობრივები ამბობენ, რომ სისტემა, რომლითაც სოფელი მარაგდებოდა „მტკვარი ჰესის“ მშენებლობისას დაზიანდა.



[თინათინ ზაზაძე, ასპინძა]