ასპინძაში სოფლის რწმუნებულებს ათავისუფლებენ

ორგანიზაცია „სამართლიანი არჩევნების“ მიერ გავრცელებული ოფიციალური განცხადების თანახმად, ასპინძის მუნიციპალიტეტის სოფლების ოშორა-იდუმალას რწმუნებული აცხადებს, რომ გამგებელმა ლევან ცაბაძემ და მისმა მოადგილემ, ალექსანდრე პაპაშვილმა რწმუნებულებს და მათ თანაშემწეებს განუცხადეს, რომ თუ თავისი ნებით არ დატოვებდნენ დაკავებულ პოზიციებს, მათ მიმართ იძულების სხვა ხერხებს გამოიყენებდნენ.

"სამართლიანი არჩევნების" ინფორმაციით, თათბირის შემდეგ, რწმუნებულების და მათი თანაშემწეების უმრავლესობამ საკუთარი განცხადების საფუძველზე თანამდებობა დატოვა, თუმცა ნაწილმა პირადი განცხადების დაწერაზე უარი განაცხადა.

სოფლების: ვარგავისა და თოკის რწმუნებულმა ლავრენტი შეშაბერიძემ "სამხრეთის კარიბჭეს" დაუდასტურა, რომ გუშინ, 2 აგვისტოს გამართულ თათბირზე გამგებელმა რწმუნებულებს განცხადებების დაწერა ნამდვილად მოსთხოვა.

„იყო ასეთი საუბარი, მაგრამ მე არ დამიწერია განცხადება, რადგან არ მიმაჩნია სამართლიანად. მიზეზს ვერ გეტყვით, ჩვენც გვაინტერესებს და გვინდა, რომ გავიგოთ რა მიზეზით უნდა დაგვეწერა განცხადებები“, - ამბობს ლავრენტი შეშაბერიძე.

ასპინძის მუნიციპალიტეტის გამგებელს ლევან ცაბაძეს "სამხრეთის კარიბჭე" რამდენიმე წუთის წინ ესაუბრა.

"არ ვიცი, თბილისში ვარ და ინფორმაცია არ მაქვს. თუ გავრცელდა ინფორმაცია, მე რაღას მირეკავ, დაწერე ის, რაც იცი, მე არავისთვის არაფერი მომითხოვია", - განაცხადა სატელეფონო საუბარში ლევან ცაბაძემ.

ამავე დროს, „სამართლიან არჩევნებთან“ საუბარში ასპინძის გამგებელი, ლევან ცაბაძე უარყოფს მუქარას, თუმცა ადასტურებს, რომ რწმუნებულებს თანამდებობის დატოვების თაობაზე განცხადების დაწერა და დროებით მოვალეობის შემსრულებლად დარჩენა მოსთხოვა. გამგებელი მოთხოვნას სოფლის მაცხოვრებლების სურვილით ხსნის. მისი განცხადებით, სოფლის მაცხოვრებლები უკმაყოფილოები არიან რწმუნებულების მუშაობით და ის რწმუნებული, რომელიც არ დატოვებს თანამდებობას, „სოფლის წინააღმდეგ წავა“.

დღესვე, ასპინძის მუნიციპალიტეტის გამგებელმა, ზეწოლის შესახებ გავრცელებული ინფორმაცია უარყო, თუმცა აღნიშნა, რომ განცხადების დაწერის თაობაზე არაერთი სოფლის რწმუნებულთან ჰქონდა საუბარი, ინტერნეტგამოცემა "ნეტგაზეთთანაც".

ასპინძის მუნიციპალიტეტში 11 რწმუნებული და ამდენივე სპეციალისტია. (ასპინძაში 24 დასახლებული პუნქტია: 1 დაბა და 23 სოფელი. დაბის გარდა ტერიტორიული ორგანოები შექმნილია 7 თემში და 4 სოფელში).

„ზუსტად ვერ გეტყვით, აქედან რამდენმა დაწერა განცხადება“, - გვითხრა ვარგავისა და თოკის რწმუნებულმა ლავრენტი შეშაბერიძემ.

"სამართლიანია არჩევნები" აცხადებს, რომ “ადგილობრივი თვითმმრთველობის შესახებ” საქართველოს ორგანული კანონისა და „საჯარო სამსახურის შესახებ“ საქართველოს კანონის თანახმად, თვითმმართველი ერთეულის რწმუნებულის გათავისუფლების უფლება მუნიციპალიტეტის გამგებელს კანონით დადგენილი საფუძვლების არსებობის შემთხვევაში თავად შეუძლია."შესაბამისად, „სამართლიანი არჩევნები“ მიიჩნევს, რომ მუნიციპალიტეტის გამგებლის მიერ რწმუნებულების მიმართ წაყენებული მოთხოვნა, საკუთარი ნებით დაწერონ განცხადებები სამსახურიდან გათავისუფლების მოთხოვნით, უკანონოა და შეიცავს მუქარისა და ზეწოლის ნიშნებს", – ნათქვამია ორგანიზაციის მიერ გავრცელებულ ინფორმაციაში.

შეგახსენებთ, ასპინძის მუნიციპალიტეტის გამგებლად მორაგბე ლევან ცაბაძე, 16 მაისს აირჩიეს. გამგებლის თანამდებობისთვის ასპინძაში სამი კანდიდატი: ლევან ცაბაძე, პაატა მაისურაძე და გიორგი ჯვარიძე იბრძოდნენ. მიმდინარე წლის 16 მაისს გამართულ საკრებულოს სხდომაზე ლევან ცაბაძის კანდიდატურას საკრებულოს 22-ვე დეპუტატმა ერთხმად დაუჭირა მხარი.

[sknews.ge]