ასპინძის მუნიციპალიტეტის გამგებელი თანამდებობას ტოვებს

გამგებლის განცხადება საკრებულოში დღეს, 18 აპრილს შევიდა. ბესიკ ბექაური ამბობს, რომ დაკავებული თანამდებობიდან წასვლის გადაწყვეტილება შექმნილი პოლიტიკური სიტუაციებიდან გამომდინარე მიიღო.

კითხვაზე, რას გულისხმობს შექმნილ პოლიტიკურ სიტუაციაში და ხომ არ ჰქონდა ადგილი ზეწოლას, ბექაური პასუხისგან თავს იკავებს.

”1 მაისამდე ვიქნები ამ პოსტზე, 1 მაისიდან ერთ-ერთი მოადგილე შეასრულებს გამგებლის მოვალეობას”, - ამბობს ბესიკ ბექაური.

ბექაური ასპინძის მუნიციპალიტეტის გამგებლის პოსტზე 2010 წლის 15 დეკემბრიდან მუშობს. გამგებლად არჩევამდე ახალციხის რაიონულ პროკურორად მუშაობდა (2006-2010 წლებში).

სამომავლო გეგმებზე ჯერ საუბარი უჭირს.

”ამ ეტაპზე სახლში მივდივარ, ცოტას დავისვენებ და მერე ვნახოთ”, - ამბობს იგი.

კითხვაზე, წავა თუ არა ხვალ თბილისში დაგეგმილ ”ნაციონალური მოძრაობის” აქციაზე, ბესიკ ბექაური გვპასუხობს რომ სავარაუდოდ წავა.

მისივე თქმით, 19 აპრილთან დაკავშირებით ასპინძაში ძალადობისა და დაშინების ფაქტები ჯერჯერობით არ გამოვლენილა.

[sknews.ge]