ასპინძის გამგებლის მოადგილე აცხადებს, რომ თანამდებობა დატოვა

ასპინძის მუნიციპალიტეტის გამგებლის მოადგილე ალექსანდრე პაპაშვილი „სამხრეთის კარიბჭესთან“ აცხადებს, რომ სამსახურიდან წასვლის შესახებ განცხადება დაწერა.

„ნამდვილად დავწერე განცხადება და წამოვედი“, – ამბობს იგი.

ასპინძის მუნიციპალიტეტის გამგეობაში კი პაპაშვილის გადაწყვეტილების შესახებ არაფერი იციან.

„არაფერი ვიცი, რა განცხადება, პაპაშვილი პოზიციაზე რჩება. განცხადება არ დაუწერია. თუ რამე გაინტერესებთ პაპაშვილს თავად ჰკითხეთ“, – ამბობს ასპინძის მუნიციპალიტეტის გამგებელი და ასპინძაში დამოუკიდებელი მერობის კანდიდატი ლევან ცაბაძე.

პაპაშვილს რომ სამსახურიდან წასვლის შესახებ განცხადება არ დაუწერია, ამაზე ასპინძის მუნიციპალიტეტის გამგეობის ადმინისტრციული სამსახურის უფროსის მოვალეობის შემსრულებელი ლელა მურადაშვილიც საუბრობს. მისი თქმით, გამგეობას საქმის ელექტრონული წარმოება აქვს, შესაბამისად განცხადება რომ არსებობდეს, ის ბაზაში მაშინვე აისახებოდა: „ამ დრომდე ასეთი განცხადება არ იძებნება, პაპაშვილმა რომ თანამდებობდა დატოვა, თქვენგან მესმის პირველად".

შეკითხვაზე, დადიოდა თუ არა პაპაშვილი ბოლო დღეებში სამსახურში მურადაშვილმა, გვიპასუხა: "დღეს მასთან საქმე არ მქონია, არც გუშინ, შესაბამისად არ ვიცი".

თავად პაპაშვილს განცხადების დაწერის თარიღსა და სამსახურიდან წასვლის მიზეზებზე საუბარი არ სურს: „დიდი ხანია ვმუშაობ. ეს ჩემი გადაწყვეტილება იყო, სხვას არაფერს უკავშირდება“.

ალექსანდრე პაპაშვილი ასპინძაში დამოუკიდებელი მერობის კანდიდატის, (ამჟამად ასპინძის მოქმედი გამგებლის) ლევან ცაბაძის საინიციატივო ჯგუფის წარმომადგენელია N39 ასპინძის საოლქო საარჩევნო კომისიაში. შესაბამისად კითხვაზე, უკავშირდება თუ არა სამსახურიდან მისი წასვლა წინასაარჩევნო პერიოდს, პაპაშვილმა არ უპასუხა. მან ტელეფონი გაგვითიშა და სხვა შეკითხვების დასმის საშუალება არ მოგვცა.

ამიტომ იყო თუ არა ზეწოლა წინასაარჩევნოდ იმასთან დაკავშირებით, რომ პაპაშვილი დამოუკიდებელი მერობის კანდიდატის ლევან ცაბაძის მხარდამჭერია და არა „ქართული ოცნების“ კანდიდატის როსტომ მაგრაქველიძის ამის გაკრვევა თავად ცაბაძესთან ვცადეთ. თუმცა, ეს შეკითხვა მანაც უპასუხოდ დატოვა.

[თამუნა უჩიძე, ასპინძა]