ლეგიტიმურია თუ არა ბორჯომის ახლად დაკომპლექტებული საკრებულო

ბორჯომის მუნიციპალიტეტის საკრებულო 28 წევრისგან შედგება. მათ შორის 13 დეპუტატი „ქართულ ოცნებას“ ჰყავს, 15–კი ოპოზიციას. დღეს, 20 ნოემბერს გამართული საკრებულოს პირველი სხდომა სიტყვიერი დაპირისპირებისა და ხმაურის გამო „ოცნების“ უხუცესმა წევრმა დაახლოებით 20:00 საათისთვის დახურულად გამოაცხადა. მან თანაგუნდელებთან ერთად დარბაზი დატოვა.

მიუხედავად იმისა, რომ სხდომას „ოცნების“ წევრები აღარ ესწრებოდნენ, დარბაზში დარჩენილმა ოპოზიციური პარტიების წარმომადგენლებმა, რომელთა საერთო რაოდენობაც საკრებულოს სიითი შემადგენლობის ნახევარზე მეტს შეადგენდა, სხდომის გაგრძელების გადაწყვეტილება მიიღო.

15–მა ოპოზიციონერმა დეპუტატმა აირჩია საკრებულოს თავმჯდომარე, ასევე საკრებულოში კომისიების თავმჯდომარეები, დაარეგსტრირა ორი ფრაქციაც.

იურისტებისა და თვითმმართველობის საკითხებში ექსპერტების განცხადებით, ადგილობრივი თვითმმართველობის კოდექსის მიხედვით, ბორჯომის ახლად დაკომპლექტებული საკრებულო ლეგიტიმურია.

„პირდაპირ წერია კოდექსის 25–ე მუხლში, რომ საკრებულოს ნახევარზე მეტი თუ ესწრება სხდომას მაშინ მის მიერ მიღებული გადაწყვეტილებები ლეგიტიმურია“, – ამბობს თვითმმართველობის საკითხებში ექსპერტი ირაკლი მელაშვილი.

„ახალგაზრდა იურისტთა ასოციაციის“ იურისტის ირმა პავლიაშვილის განმარტებით, ასევე თვითმმართველობის კოდექსის 33–ე მუხლში, რომელიც საკრებულოს თავმჯდომარის არჩევას გულისხმობს, წერია, რომ „მუნიციპალიტეტის საკრებულოს თავმჯდომარეს თავისი შემადგენლობიდან, მუნიციპალიტეტის საკრებულოს უფლებამოსილების ვადით, სიითი შემადგენლობის ნახევარზე მეტით ირჩევს მუნიციპალიტეტის საკრებულო“.

აქედან გამომდინარე, პავლიაშვილი აცხადებს, რომ თავმჯდომარის ასარჩევად ქვორუმი საკმარისი იყო. მისივე თქმით, სიითი შემადგენლობის ნახევარზე მეტი ირჩევს კომისიების თავმჯდომარეებსაც. ამას კი თივთმმართველობის კოდექსის 36–ე მუხლი არეგულირებს: „აქედან გამომდინარე თავმჯდომარისა და საკრებულოს კომისიების თავმჯდომარეების არჩევაც ლეგიტიმური გამოდის“.

რაც შეეხება შეკითხვას იმის შესახებ, შეიძლება თუ არა, რომ სხდომის არასამუშაო საათებში მიმდინარეობამ მის მიერ მიღებული გადაწყვეტილების ლეგიტიმურობა კითხივის ნიშნის ქვეშ დააყენოს, მელაშვილი გვპასუხობს: „თუ სხდომის გაგრძელებას დამსწრეთა უმრავლესობამ კენჭი უაყარა და სხდომის გაგრძელების გადაწყვეტილება ისე მიიღეს, პრობლემა არ იქნება. პარლამენტში არასამუშაო საათბში სხდომების მიმდინარეობა ასე გრძლედება“.

შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[თამუნა უჩიძე, ბორჯომი]