ბორჯომში საკრებულოს პირველი სხდომა ხმაურის ფონზე მიმდინარეობს [Video]

ბორჯომის საკრებულოს პირველი სხდომის დღის წესრიგი რვა საკითხისგან შედგება, თუმცა მათ შორის ჩამონათვალში საკრებულოს კომისიების თავმჯდომარეების არჩევა გათვალისწინებული არ არის.

საკრებულოს დეპუტატმა "ლეიბორისტული პარტიიდან" გიორგი გიუაშვილმა სხდომის შეჩერება და დღის წესრიგის ჩასწორება მოითხოვა. მას მხარი დაუჭირა დეპუტატმა „პატრიოტთა ალიანსიდან“ ზაზა ჩაჩანიძემ.

„ქართული ოცნების“ დეპუტატის გიორგი ფერაძის თქმით, არაა სავალდებულო პირველივე სხდომაზე საკრებულოს კომისიების თავმჯდომარეების არჩევა: „ამით კანონი არ ირღვევა“, – განაცხადა მან.

ასევე „ქართული ოცნების“ დეპუტატის ირაკლი კვირკველიას თქმით, „ამ სხდომაზე საკრებულოს თავმჯდომარეს აირჩევენ, მომავალი სხდომისთვის კი კომისიის თავმჯდომარეებს“.

სხდომის წარმართვის საშუალება საკრებულოს უხუცეს წევრს ანდრო თედიაშვილს არ მიეცა. ამის გამო 30 წუთი შესვენება გამოცხადდა.

სხდომას როგორც ოპოზიციური, ასევე მმართველი პარტიის მხარდამჭერები ესწრებიან.





შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]