ბორჯომის საკრებულოს ‘ოცნების’ დეპუტატებმა სხდომა დატოვეს [Video]

ბორჯომის ოპოზიციონერ დეპუტატებს სამანდატო კომისიის სამივე წევრის არჩევა ოპოზიციიდან სურთ. „ოცნება“ კი კომისიაში მათი პარტიიდან ერთი წარმომადგენლის არჩევას ითხოვდა. ამას ოპოზიციონერი დეპუტატები არ დაეთანხმნენ.

„ყველამ დავასახელოთ სამანდატო კომისიის წევრებად ჩვენი კანდიდატები, შემდეგ კი წილისყრით ავირჩიოთ“, – შესთავაზეს „პატრიოტთა ალიანსის“ დეპუტატებმა ქართული ოცნების დეპუტატებს.

თუმცა, ამაზე მმართველი გუნდის წარმომადგენლების მხრიდან უარი მიიღეს. რის შემდეგაც უხუცესმა წევრმა, ანდრო თედიაშვილმა რომელსაც სხდომა მიყავდა განაცხადა, რომ მას ამ ვითარებაში მუშაობის გაგრძელება არ შეუძლია და დარბაზი დატოვა. თედიაშვილთან ერთად სხდომა დატოვეს „ოცნების“ სხვა დეპუტატებმაც.

„კანონით მონიჭებული უფლებამოსილების ფარგლებში გავაკეთე ის რასაც კანონი მავალებდა. დოკუმენტაცია გადავეცი საკრებულოს უხუცეს წევრს. ვიდრე თქვენი საკრებულოს ორი მესამედის უფლებამოსილება არა გახდება ცნობილი გადაწყვეტილებებს ვერ მიიღებთ“, – მიმართა საკრებულოს დარბაზში დარჩენილ დეპუტატებს N36 ბორჯომის საოლქო საარჩევნო კომისიის თავმჯდომარემ ლევან დევიძემ.

მან საკრებულოს სთხოვა, რომ მას მისცენ საშუალება მასზე დაკისრებული უუფლებამოსილება განახორციელოს: „ნუ შევქმნით ისეთ პრეცენდენტს, რომელიც თქვენ მიღებულ გადაწყვეტილებებს არარად ჩათვლის. ნუ გადააყოლებთ ამ ამბავს პოლიტიკურ კინკლაობას“.

დევიძის გამოსვლის შემდეგ საკრებულოს სხდომის წარმართვა დარბაზში დარჩენილმა უხუცესმა წევრმა „პატრიოტთა ალიანსიდან“ ვიოლეტა ბალახაშვილმა გააგრძელა. ოპოზიციამ სამანდატო, ასევე, ხმის დამთვლელი კომისია აირჩია.



შეგახსენებთ, რომ დღეს, 20 ნოემბერს ბორჯომში საკრებულოს პირველი სხდომა იმართება. სხდომაზე დღის წესრიგით გათვალისწინებული 8 საკითხი საკრებულოს კომისიების თავმჯდომარეების არჩევას არ ითვალისწინებს. ამას მოჰყვა „ლეიბორისტული პარტიის“ დეპუტატი გიორგი გიუაშვილის პროტესტი. მას მხარი საკრებულოს სხვა ოპოზიციონერმა დეპუტატებმაც დაუჭირეს.

შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]