ბორჯომის საკრებულოს თავმჯდომარედ ოპოზიციამ ზაზა ჩაჩანიძე აირჩია

ზაზა ჩაჩანიძის გადაწყვეტილებით, მისი მოადგილე მისივე პარტიის წევრი გიორგი გოგიჩაიშვილი იქნება.

არჩევნებში მონაწილეობას მხოლოდ ოპოზიციური პარტიების დეპუტატები იღებდნენ, რადგან „ოცნების“ უხუცესმა წევრმა სხდომა დახურულად გამოაცხადა და დარბაზი თანაგუნდელებთან ერთად დატოვა.

"ოპოზიციური პარტიების წარმომადგნლებსაც აქვთ საინტერესო ხედვები თავიანთი ისტორიული ქალაქის განვითარების. სასიკეთო ხედვებს გავატარებთ ერთად", – განაცხადა არჩევნების დასრულების შემდეგ ჩაჩანიძემ.

რაც შეეხება შეკითხვას იმის შესახებ ლეგიტიმურია თუ არა მისი არჩევა, პასუხობს: "მიმართონ სასამართლოს და ამას იქ გაარკვევენ".

ჩაჩანიძეც და გოგიჩაიშვილიც ფიქრობენ, რომ საკრებულოში მუშაობა მარტივი არ იქნება, რადგან "ოცნებას" აქ 13 წევრი ჰყავს.

"ალბათ როგორც დღეს, შემდგომშიც ეცდებიან ხელისშეშლას, მაგრამ მაქსიმალურად ვეცდებით ვიმუშაოთ და ბორჯომისთვის ბევრი სასიკეთო რამ გავაკეთოთ", – განაცხადა გოგიჩაიშვილმა.

ოპოზიცია საკრებულოს სხდომას აგრძელებს. დეპუტატებმა კომისიების თავმჯდომარეები უნდა აირჩიონ.



შეგახსენებთ, რომ დღეს, 20 ნოემბერს ბორჯომში საკრებულოს პირველი სხდომა ხმაურის ფონზე მიმდინარეობს. ოპოზიცია დღის წესრიგში ერთი საკითხის დამატებას, კომისიების თავმდჯომარეების არჩევას ითხოვდა. დეპუტატები ამაზე შეთანხმდნენ, თუმცა ამის შემდეგ დავის მიზეზი სამანდატო კომისიის არჩევის წესი გახდა. რის შედეგადაც "ოცნებამ" სხდომა დატოვა.

სხდომაზე დაძაბული ვითარების გამო საკრებულოს დეპუტატები შეუძლოდ გახდნენ. ამიტომ მერიაში სასწრაფო გამოიძახეს, ერთ–ერთი მათგანი კი საავადმყოფოში გადაიყვანეს.

დაახლოებით, 30 წუთიანი შესვენების შემდეგ საკრებულოს სხდომა კვლავ სრული შემადგენლობით განახლდა, თუმცა სხდომის მიმდინარეობისას "ლეიბორისტული პარტიის" "ქართული ცონების დეპუტატმა სიტყვიერი დაპირისპირების დროს ბოთლი ესროლა.

ასევე შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]