ბორჯომის საკრებულოში თავმჯდომარეს ირჩევენ [Video]

ბორჯომის მუნიციპალიტეტის საკრებულოში ექვს საათზე მეტია საკრებულოს სხდომა ხმაურისა და დაპირსპირების ფონზე მიმდინარეობს. მას შემდეგ, რაც საკრებულოში პოლიცია გამოიძახეს, „ოცნების“ უხუცესმა დეპუტატმა სხდომა დახურულად გამოაცხადა. მან დარბაზი თანაგუნდელებთან ერთად დატოვა.

„სამუშაო ვადა ამოიწურა, ამიტომ გადაწყვეტილებები მიღებული აღარ იქნება“, – განაცხადა სხდომის დატოვებისას „ოცნების“ უხუცესმა წევრმა ანდრო თედიაშვილმა.

მიუხედავად იმისა, რომ საკრებულო მმართველი გუნდის წევრებმა დატოვეს, ოპოზიცია სრული შემადგენლობით დარბაზში დარჩა.

„ჩვენ, ოპოზიცია ვართ უმრავლესობაში, საკრებულოს თავმჯდომარეს ავირჩევთ და მომავალ სხდომას დავნიშნავთ“, – განაცხადა „პატრიოტთა ალიანსის“ დეპუტატმა ზაზა ჩაჩანიძემ.

ოპოზიციამ საკრებულოს თავმჯდომარის პოზიციაზე ორი კანდიდატი „პატრიოტთა ალინასიდან“ ზაზა ჩაჩანიძე, „ნაციონალური მოძრაობიდან“ კი ვახტანგ ქვათაძე დაასახელა. საკრებულოში თვმჯდომარის ასარჩევად ხმის მიცემის პროცედურა მშვიდ ვითარებაში მიმდინარეობს.



შეგახსენებთ, რომ დღეს, 20 ნოემბერს ბორჯომში საკრებულოს პირველი სხდომა ხმაურის ფონზე მიმდინარეობს. ოპოზიცია დღის წესრიგში ერთი საკითხის დამატებას, კომისიების თავმდჯომარეების არჩევას ითხოვდა. დეპუტატები ამაზე შეთანხმდნენ, თუმცა ამის შემდეგ დავის მიზეზი სამანდატო კომისიის არჩევის წესი გახდა. რის შედეგადაც "ოცნებამ" სხდომა დატოვა.

სხდომაზე დაძაბული ვითარების გამო საკრებულოს დეპუტატები შეუძლოდ გახდნენ. ამიტომ მერიაში სასწრაფო გამოიძახეს, ერთ–ერთი მათგანი კი საავადმყოფოში გადაიყვანეს.

დაახლოებით, 30 წუთიანი შესვენების შემდეგ საკრებულოს სხდომა კვლავ სრული შემადგენლობით განახლდა, თუმცა სხდომის მიმდინარეობისას "ლეიბორისტული პარტიის" "ქართული ცონების დეპუტატმა სიტყვიერი დაპირისპირების დროს ბოთლი ესროლა.

ასევე შეგახსენებთ, რომ სამცხე–ჯავახეთში ყველაზე მრავალპარტიული საკრებულო ბორჯომს ჰყავს. საკრებულოში ოთხი ოპოზიციური პარტიის წარმომადგენელი შევიდა. ბორჯომი რეგიონში ის გამონაკლისია, სადაც „ოცნებას“ უმრავლესობა არ აქვს, – საკრებულოში 13 დეპუტატი მმართველი გუნდიდან, 15 კი ოპოზიციიდანაა.

[sknews.ge]