ახალციხის ბიბლიოთეკაში დაზიანებული წიგნების დამუშავება დაიწყეს

დეზინფექციის სამსახურიდან სპეცილასტები ახალციხის ბიბლიოთეკის სარდაფში მოთავსებული წიგნების შესაწამლად 10 მაისს ჩამოვიდნენ. სპეციალური ხსნარით სარდაფი და წიგნები, ასევე, საგამოფენო დარბაზებიც დამუშავდა.

ახალციხის კულტურის დაწესებულებათა გაერთიანების დირექტორის ბელა მოდებაძის განცხადებით, წიგნების შესაწამლად ადგილობრივი ბიუჯეტიდან 500 ლარამდე გამოიყო: ”სამი დღე წიგნები ჩახუთულ სივრცეში უნდა იყოს, შემდეგ გაიწმინდება მშრალი ტილოთი და დარბაზში განთავსდება”.

ბიბლიოთეკის მენეჯერის თინათინ კაპანაძის თქმით, საგამოფენო დარბაზებში მაქსიმუმ 10 ათასი წიგნის განთავსება შეიძლება, ესეც იმ შემთხვევაში, თუ თაროებს დაამატებენ.

”ამიტომ, რაც არ უნდა მოხდეს, ალტერნატიული ფართი უნდა გამოინახოს, სადაც ამ წიგნების ნაწილი განთავსდება. წინააღმდეგ შეთხვევაში, როგორც სპეციალისტებმა გვითხრეს, სარდაფში წიგნები გაფუჭდება”, - ამბობს მოდებაძე და ამატებს, რომ თუ წიგნების სხვაგან გადატანა ვერ მოხერხდება, მაშინ სარდაფში სპეციალური სავენტილაციო სისტემა უნდა დამონტაჟდეს.

სარდაფიდან წიგნების ამოტანას დაახლოებით ორ დღეში დაიწყებენ.

”ცოტა თუ არ განიავდა, იქ შესვლა და წიგნების ამოზიდვა შეუძლებელია”, - გვითხრა კაპანაძემ.

შეგახსენებთ, რომ ბიბლიოთეკის სარდაფში დამაპალი ათასობით წიგნის შესახებ ”სამხრეთის კარიბჭემ” პირველი სტატია მიმდინარე წლის 24 აპრილს გამოაქვეყნა.

რამდენი წიგნის ამოტანა გახდება შესაძლებელი და რა ბედი ეწევა იმ წიგნებს, რომლებიც საგამოფენო დარბაზებში არ დაეტევა, ”სამხრეთის კარიბჭე” უახლოეს დღეებში მოგითხრობთ.

[თამუნა უჩიძე, ახალციხე]