ლპობას გადარჩენილ წიგნებს ბიბილიოთეკის დარბაზში ვერ აბრუნებენ

ახალციხის ცენტრალურ ბიბლიოთეკის სარდაფში 2011 წელს დაზიანებული წიგნების ის ნაწილი, რომელიც გაფუჭებას გადაურჩა და დეზინფექცია ჩაუტარდა, ბიბლიოთეკის საგამოფენო დარბაზში ვერ ამოაქვთ.

ახალციხის კულტურის დაწესებულებათა გაერთიანების ხელმძღვანელი ზაირა კელაპტრიშვილი ამბობს, რომ დაზიანებულ წიგნებს დეზინფექცია გაურკვეველი ხსნარით ჩაუტარდა და არ არის გამორიცხული, წიგნებმა მკითხველის ჯანმრთელობაზე იმოქმედოს: „თავის დროზე ეს წიგნები რაღაც გაურკვეველი ხსნარით შეიწამლა, თან ისე, როგორც კარტოფილს წამლავენ. დეზინფექცია მარტო იატაკს, მაგიდებს და კედლებს უნდა ჩატარებოდა და არა წიგნებს“.

კელაპტრიშვილის თქმით, ამ პროცესისთვის ბიბლიოთეკის მაშინდელ მენეჯერს უნდა ედევნებინა თვალი, შესაბამისად, პასუხისმგებლობაც მას ეკისრება: „ათასობით წიგნის გაფუჭებას კულტურის დაწესებულებათა გაერთიანების მაშინდელი ხელმძღვანელი შეეწირა, თუმცა არანაირი რეაგირება არ იყო თინათინ კაპანაძეზე. არადა, საბიბლიოთეკო ფონდზე პასუხისმგებლობა, ყველა თანამშრომელთან ერთად, მენეჯერსაც ეკისრება“.

რა ხსნარით დამუშავდა დაზიანებული წიგნები, არც ბიბლიოთეკის მაშინდელმა მენეჯერმა თინათინ კაპანაძემ იცის. მისი თქმით, იმ პერიოდში ფეხმძიმედ იყო და პროცესისთვის თვალი არ უდევნებია: „როგორც ვიცი, ყველაფერი წესების დაცვით გაკეთდა. პირადად არ დავსწრებივარ ამ პროცესს, თუმცა ვიცი, რომ აღნიშნული ხსნარი ადამიანის ჯანმრთელობას საფრთხეს არ უქმნის“.

წიგნებმა მკითხველის ჯანმრთელობაზე რომ არ იმოქმედოს, მათ დარბაზში დაბრუნებამდე კელაპტრიშვილი სპეციალური კომისიის შექმნას გეგმავს: „უკვე ვესაუბრე ქალაქის მერს, გვინდა, რომ ამ წიგნების ექსპერტიზა ჩავატაროთ. უნდა დავადგინოთ რაიმე პრობლემას ხომ არ შეუქმნის მკითხველის ჯანმრთელობას“.

აღნიშნული წიგნები ამ დრომდე ახალციხის კულტურის სახლში ინახება.

შეგახსენებთ, რომ 2011 წლის დეკემბერში, ახალაშენებული ცენტრალური ბიბლიოთეკის დარბაზში ფართის არარსებობის გამო, 30.000–მდე წიგნი სარდაფში შეინახეს. შესაბამისი კონდიცირების არარსებობის გამო კი წიგნების ნაწილი დაზიანდა. მას შემდეგ, რაც დაზიანებული წიგნები აღმოაჩინეს, ისინი ჯერ ხსნარით დაამუშავეს, შემდეგ კი მზეზე გააშრეს. თუმცა, დარბაზში არ დაუბრუნებიათ.

[მანანა სარაშვილი, ახალციხე]