ახალციხის ბიბლიოთეკის ეზოში წიგნებს აშრობენ

„წამლიან წიგნებს გაშრობა უნდა, ამიტომ გადავწყვიტეთ, რომ წიგნების ნაწილი მზეზე გამოგვეტანა. მეორე ნაწილს მას შემდეგ ამოვიტანთ, როცა ეს წიგნები გაშრება“, - ამბობს ახალციხის ცენტრალური ბიბლიოთეკის მენეჯერი თინათინ კაპანაძე.

გამშრალ წიგნებს ფონდში დააწყობენ, დაზიანებულებს კი ჩამოწერენ.

„სოკოსა და ნესტისგან გაფუჭებული წიგნების სია ჩამოსაწერად თითქმის მზად არის“, - ამბობს კაპანაძე.

ამ ეტაპზე, პარალელურად, შეწამლულ წიგნებს სპირტითა და გამოხდილი წყლით წმენდენ.

შეგახსენებთ, რომ ახალციხის ცენტრალური ბიბლიოთეკის სარდაფში ათასობით წიგნი დაზიანდა.ამ ფაქტის გამო სამსახური დაატოვებინეს, ახალციხის კულტურის დაწესებულებათა გაერთიანების დირექტორს, ბელა მოდებაძეს.

ბიბლიოთეკის სარდაფში არსებულ გაფუჭებულ წიგნებს დეზინფექცია ერთი თვის წინ ჩაუტარდა, რის შემდეგაც წიგნების მხოლოდ ნაწილი გადარჩა. რა ოდენობის ზარალი მიიღო ბიბლიოთეკამ, ჯერ უცნობია. გაფუჭებული წიგნების აღსაწერად სპეციალური კომისია უნდა შედგეს, რომელიც ამ დრომდე არ შექმნილა.



[მანანა სარაშვილი, ახალციხე]