რას პასუხობს ბიბლიოთეკის პროექტის ავტორი გიქოშვილს

ახალციხის მუნიციპალიტეტის საკრებულოს დაკვეთით ბიბლიოთეკის შენობის პროექტი შპს ”ესსამ” გააკეთა. საკრებულოს ყოფილი თავმჯდომარის მალხაზ გიქოშვილის თქმით, ბიბლიოთეკა არსებული წიგნადი ფონდის რაოდენობის მიხედვით დაპროექტდა.

”სამხრეთის კარიბჭესთან” კი ბიბლიოთეკის პროექტის კონცეფციის ავტორმა არქიტექტორმა ნიკა ჩხაიძემ საპირისპირო განაცხადა: ”რამდენი წიგნი უნდა დატეულიყო ბიბლიოთეკაში ზუსტად განსაზღვრული არ იყო”.

მიუხედავად იმისა, რომ ”სამხრეთის კარიბჭესთან” აღნიშნულს ყველა უარყოფს და აცხადებს, რომ მშენებლობისას წიგნების რაოდენობა განსაზღვრული არ იყო, გიქოშვილი ცდილობს დაგვიდასტუროს, რომ პროექტში საცავებიცა და საგამოფენო დარბაზებიც ყველა საჭირო მოთხოვნის გათვალისწინებით გაკეთდა: ”თავიდანვე იყო გათვალისწინებული ფართის ოდენობა”.

ჩხაიძის განცხადებით, ბიბლიოთეკის პროექტის კონცეფცია სამკითხველო დარბაზების სივრცის და არა წიგნების რაოდენობის მიხედვით გაკეთდა: ”წესით და რიგით ყველაფერი დავალებაში უნდა ყოფილიყო მითითებული”.

კითხვაზე თუ ვის უნდა შეედგინა დავალება ჩხაიძე გვპასუხობს: ”ეგ საკრებულოს ჰკითხეთ”.

მისივე განცხადებით, თუ ბიბლიოთეკაში წიგნები ვერ დაეტია არ არის სავალდებულო ყველა წიგნი ბიბლიოთეკაში მოთავსდეს: ”შესაძლოა, საცავები სხვაგან გაკეთდეს და წინგები იქ შეინახონ, ახალციხე ნიუ იორკი არ არის, რომ გამოწერის შემთხვევაში წიგნების მოტანა გაჭირდეს”.

შეგახსენებთ, რომ ახალციხის ცენტრალური ბიბლიოთეკის სარდაფში ათასობით წიგნი იმ მიზეზით დალპა, რომ მათი სამკითხველო დარბაზებში განთავსება ვერ მოხერხდა.

[თამუნა უჩიძე, ახალციხე]