დაზიანებული წიგნები ისევ ბიბლიოთეკის სარდაფშია

ახალციხის ცენტრალურ ბიბლიოთეკაში დაზიანებული წიგნების დამუშვება დასრულდა. ვიდრე საგამოფენო სივრცეში დააბრუნებენ, შეწამლული წიგნები სპეციალური ხსნარით უნდა გაიწმინდოს, თუმცა, ხსნარის შესაძენად თანხა ჯერ არ მიუღიათ

ახალციხის ბიბლიოთეკის სარდაფში აღმოჩენილ დაზიანებულ ათასობით წიგნს დეზინფექცია ორი კვირის წინ ჩაუტარეს. სპეციალური ხსნარით სარდაფი და წიგნები, ასევე საგამოფენო დარბაზები დამუშავდა. 30 ათასამდე წიგნიდან ნაწილი გაფუჭებას გადაურჩა, თუმცა წიგნებს დამუშავება ისევ სჭირდება.

”გვინდა სპირტი და გამოხდილი წყალი, რომ შეწამლული წიგნები გავწმინდოთ. ისე ფონდში ვერ დავაწყობთ”, - ამბობს ახალციხის ბიბლიოთეკის მენეჯერი თინათინ კაპანაძე.

ახალციხის კულტურის დაწესებულებათა გაერთიანების სამსახურში სადეზინფექციო ხსნარზე მოთხოვნა 16 მაისს გააგზავნეს. აღნიშნული სამსახურის ხელმძღვანელმა ბელა მოდებაძემ, რომელიც სამსახურიდან 3 ივნისს გაათავისუფლეს, მოთხოვნა ახალციხის მუნიციპალიტეტის საკრებულოში გადაამისამართა.

ახალციხის მუნიციპალიტეტის საკრებულოს თავმჯდომარე ოლეგ სანდროშვილი ამბობს, რომ საკრებულომ მოთხოვნა განიხილა და ხარჯების დასაზუსტებლად ახალციხის მუნიციპალიტეტის გამგეობას გადაუგზავნა.

”დაზუსტდება ხარჯის ოდენობა და ბიუჯეტიდან გამოიყოფა იმდენი, რამდენიც იქნება საჭირო”, - ამბობს სანდროშვილი.

ახალციხის მუნიციპალიტეტის გამგებლის ბესიკ ბლიაძის თქმით, აღნიშნული მოთხოვნა დასამუშავებლად შესაბამის სამსახურს გადაეგზავნა: ”მოთხოვნა ახალციხის მუნიციპალიტეტის გამგეობის ეკონომიკისა და ინფრასტრუქტურის სამსახურს გადაეგზავნა, შემდეგ საფინანსო სამსახური მოთხოვნას თანხობრივად დაამუშავებს. ამის შემდეგ შევა ბიუჯეტში ცვლილებები”.

ბიუჯეტში ცვლილებების შეტანა კი ისევ საკრებულოს სხდომაზეა დამოკიდებული. როდის გაიმართება საკრებულოს სხდომა, ჯერ ესეც უცნობია. საკრებულოს თავმჯდომარე გუშინ მივლინებაში გაემგზავრა.

[მანანა სარაშვილი, ახალციხე]