ასპინძის ქუჩაზე აღდგენითი სამუშაოები მიმდინარეობს

შემთხვევა გუშინ 23 აპრილს მოხდა. ძლიერმა ქარმა ახალციხეში, ასპინძის ქუჩაზე #28 ბინას სახურავი მთლიანად გადახადა. ძირს ჩამოვარდნილმა სახურავმა ბუნებრივი აირის დაახლოებით 100 მეტრი სიგრძის მილი დააზიანა. კომპანია ”ელ-ენის” წარმომადგენლები დაზიანებული მილის შეკეთებას დილიდან ცდილობენ.

”ბუნებრივი აირი სამ კორპუსს არ მიეწოდება. დაახლოებით 100 აბონენტი გაზის გარეშეა დარჩენილი. გაზის მიწოდება ერთი კვირის განმავლობაში ეტაპობრივად აღდგება”, - განმარტავს კომპანია ”ელ-ენის”დირექტორი ვასო აბულაძე.

ჩამოვარდნილმა სახურავმა ასპინძის ქუჩაზე სატელეფონო ხაზებიც დააზიანა. ამ დრომდე 158 აბონენტს ტელეფონი გათიშული აქვს. შესაბამისად არ მიეწოდებათ ინტერნეტიც. იმის გამო, რომ ახალი სადენები მიწის ქვეშ უნდა გაიყვანონ ადღგენითი სამუშაოები დაახლოებით ორი კვირის განმავლობაში გაგრძელდება. კომპანია სილქნეტში ამბობენ, რომ ზარალი 50 000 ათას ლარზე მეტს შეადგენს.

”თბილისიდან სპეციალური ჯგუფი უკვე ჩამოსულია. მიწა 200 მეტრამდეა გასაჭრელი, რომ სადენი მიწაში ჩაიდოს. სამუშაოს მოცულობიდან გამომდინარე ვცდილობთ რაც შეიძლება მალე დავასრულოთ. დიდი მნიშვნელობა აქვს რომ ამინდმაც ხელი შეგვიწყოს”, - გვითხრა სატელეფონო საუბარში კომპანია ”სილქნეტის” სამცხე-ჯავახეთის რეგიონული ფილიალის დირექტორმა გია წიქარიშვილმა.

შეგახსენებთ, რომ ეზოში ჩამოყრილმა სახურავმა იქვე მდგომი რამდენიმე მსუბუქი ავტომანქანაც დააზიანა. ამ დრომდე გადახდილია ბინის სახურავიც. ადგილობრივები ხელისუფლებისგან დროულ დახმარებას ითხოვენ.

”წვიმა რომ მოვიდეს ყველას სახლში ჩავა. აუცილებელია გადახურვა დროზე დაიწყონ”, - ამბობს ასპინძის ქუჩის მცხოვრები არმელოდი ლაცაბიძე.



[თინათინ ზაზაძე, ახალციხე]