რვასართულიან კორპუსზე სახურავის გადახურვა სრულდება

რვასართულიანი კორპუსის გადახურვა სტიქიიდან 5 დღის შემდეგ დაიწყო და ამ დრომდე გრძელლდება. სარეაბილიტაციო სამუშაოებს სამშენელო კომპანია შპს „მშენებელი -2004“ ასრულებს. კოპუსის გადასახურად ადგილობრივი ბიუჯეტიდან 69.818 ლარი დაიხარჯება.

ახალციხის მერიაში განმარტავენ, რომ სამუშაოები აქტიურად მიმდინარეობს და სამშენებლო კომპანია კორპუსის გადახურვას ხელშეკრულებით გათვალისწინებულ დროზე ადრე დაასრულებს.

„ამ ეტაპზე მიმდინარეობს დაზიანებული ნაწილის დემონტაჟი და პარალელურად სახურავის გადახურვა ხდება. სამუშაოების 2/3 უკვე შესრულებულია“, – ამბობს ახალციხის მერის საორგანიზაციო განყოფილების უფროსი ეკა ბერიძე.

შეგახსენებთ, რომ ძლიერმა ქარმა სახურავი რვასართულიან კორპუსს 23 მაისს გადახადა. შემთხვევის შედეგად არავინ დაშავებულა, თუმცა, სახურავის ნარჩენებმა 5 მანქანა და ელექტროგადამცემი ხაზები დააზიანა. მომხდარის შემდეგ მერის დავალებით შექმნა სამუშაო ჯგუფი, რომელმაც "წითელი სახურავების“ საქმე უნდა შეისწავლოს.

გარდა აღნიშნულისა, სახურავგადახდლი კორპუსის საქმეს პროკურატურაც იძიებს. ძიება სისხლის სამართის კოდექსის 188–ე მუხლის პირველი ნაწილით მიმდინარეობს, რაც გაუფრთხილებლობით სხვისი ნივთის დაზიანებას, ან განადგურებას გულისხმობს, რამაც მნიშვნელოვანი ზიანი გამოიწვია.

[sknews.ge]