რვასართულიანი კორპუსის გადახურვა დაიწყეს

დღეს, 28 მაისს, თამარაშვილის ქუჩაზე მდებარე რვასართულიანი კორპუსის სახურავის გადახურვა დაიწყეს. კომპანიამ, რომელმაც სარეაბილიტაციო სამუშაოები უნდა შეასრულოს, სამშენებლო მასალები კორპუსის ეზოში უკვე მიიტანა.

ახალციხის მერიაში განმარტავენ, იმისათვის რომ სახურავი უმოკლეს დროში გადაეხურათ, ტენდერი აღარ გამოაცხადეს და ერთპირთან მოლაპარაკების შედეგად ხელშეკრულება შპს „მშენებელი 2004“-თან გააფორმეს.

„გადაუდებელი შესყიდვა განხორციელდა“,- ამბობს ახალციხის მერიის საორგანიზაციო განყოფილების უფროსი ეკა ბერიძე.

მისივე თქმით, სარეაბილიტაციო სამუშაოებისთვის ადგილობრივი ბიუჯეტიდან 72 ათასი ლარი დაიხარჯება:“აღნიშნულმა კომპანიამ ყველაზე დაბალი თანხა შემოგვთავაზა“.

შეგახსენებთ, რომ ძლიერმა ქარმა სახურავი რვასართულიან კორპუსს 23 მაისს გადახადა. შემთხვევის შედეგად არავინ დაშავებულა, თუმცა, სახურავის ნარჩენებმა 5 მანქანა და ელექტროგადამცემი ხაზები დააზიანა. მომხდარის შემდეგ მერის დავალებით შექმნილია სამუშაო ჯგუფი, რომელმაც "წითელი სახურავების“ საქმე უნდა შეისწავლოს.

გარდა აღნიშნულისა, სახურავგადახდლი კორპუსის საქმეს პროკურატურაც იძიებს. ძიება სისხლის სამართის კოდექსის 188–ე მუხლის პირველი ნაწილით მიმდინარეობს, რაც გაუფრთხილებლობით სხვისი ნივთის დაზიანებას, ან განადგურებას გულისხმობს, რამაც მნიშვნელოვანი ზიანი გამოიწვია.


[თინათინ ზაზაძე, ახალციხე]