ახალციხის მერი ვეტერანების საქმეზე: „სოფლებში სახლები აქვთ და იქ იცხოვრონ“

სკოლის ყოფილ შენობაში შესახლებულ ვეტერანებს, შესაძლოა, უახლოეს დღეებში სასამართლოს გადაწყვეტილებით, შენობა დაატოვებინონ. ვეტერანების ოჯახის წევრები ახალციხის ადგილბორივ თვთმმართველობას ფართით დაკმაყოფილებას სთხოვენ. თუმცა, ქალაქის მერიაში აცხადებენ, რომ ამ მიმართულებით მუშაობა არ მიმდინარეობს.

„მათთვის ბინების მოძიებაზე არ ვმუშაობ და ფათით მათ დაკმაყოფილებას არ ვაპირებ. სოფლებში სახლები აქვთ და იქ იცხოვრონ. ურაველში ადამიანს ორსართულიანი სახლი ჰქონდეს და ქალაქში თხოულობდეს ბინას ასეთია რაფერი მინახავს. ან ადიგენის მაცხოვრებელი იყოს და ახალციხეში ითხოვდეს ბინას“, – ამბობს ვლადიმერ ზედგინიძე.

მისი თქმით, ქალაქში გამოუყენებელი შენობები არსებობს, თუმცა ისინი მერიის ბალანსზე არაა. ამიტომ სხვადასხვა უწყებებში მათი თვითმმართველობისთვის გადაცემის მოთხოვნით წერილები გაგზავნილია: „ვმუშაობ იმისთვის, რომ ქალაქის ტერიტორია და მასში შემავალი შენობები დადგინდეს. ამ შენობების მერიის ბალანსზე გადაცემის შემთხვევაში გაირკვევა ვის რითი შეიძლება დავეხმაროთ, მაგრამ ჯერ იმ ადამიანებს უნდა აღმოვუჩინოთ დახმარება ვისაც მართლა უჭირს და სახლ–კარი არ აქვს. პირველ რიგში დახმარება ასეთ ადამიანებს სჭირდებათ“.

შეგახსენებთ, რომ ახალციხის რაიონული სასამართლო ქალაქის მერიის სარჩელს იხილავს, რომლის მიხედვითაც თვითმმართველობა მათ ბალანსზე რიცხულ შენობაში შესახლებული ვეტერანების დაუყოვნებლივ გამოსახლებას ითხოვს.

ვეტერანების 9 ოჯახმა, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს უნებართვოდ დაიკავეს. სადავო შენობა მერიის საკუთრებაა, თუმცა ის 2014 წლის 4 ივნისს უზურფრუქტის წესით (ხელშეკრულება N36) ააიპ სამცხე–ჯავახეთის რეგიონული განვითარების სააგენტოს გადაეცა. სააგენტომ აქ საჯარო მოხელეთა გადამზადების ცენტრი უნდა გაიხსნას.

[თამუნა უჩიძე, ახალციხე]