ვეტერანების საქმის განხილვა დასრულდა

ვეტერანების საქმის მთავარი სხდომა დღეს, 31 მარტს, ახალციხის რაიონულ სასამართლოში, დაახლოებით ორ საათს გაგრძელდა. სასამართლომ სკოლის შენობაში შესახლებული ვეტერანების პოზიცია, ასევე, მხარეების საბოლოო სიტყვები მოისმინა.

სასამართლოს ახალციხის მერიის იურისტმა მერი გოგოლაურმა ვეტერანების დაუყოვნებლივ გამოსახლება სთხოვა. მოპასუხე მხარის ადვოკატმა, ივანე ტატალაშვილმა კი მოსამართლეს სთხოვა მხოლოდ იმ შემთხვევაში დაუშვას აღნიშნული შენობიდან ვეტერანების გამოსახლება, თუ მათ სანაცვლოდ სახლემწიფო ბინებს მისცემს.

მესამე მხარის, ანუ ააიპ „სამცხე–ჯავახეთის რეგიონული განვითარების სააგენტოს“ ადვოკატი ეკა აბაშიძე მოსარჩელე მხარის პოზიციას დაეთანხმა: „დაუყოვნებლივ უნდა დატოვონ ვეტერანებმა ეს შენობა და აქ საჯარო მოხელეთა გადამზადების ცენტრი უნდა მოეწყოს“.

შეგახსენებთ, რომ ახალციხის რაიონული სასამართლო ახალციხის მერიის სარჩელს იხილავს. ქალაქის მერია პეტრე იბერის N17–ში, სკოლის ყოფილ შენობაში შესახლებული ვეტერანების დაუყოვნებლივ გამოსახლებას ითხოვს. აღნიშნულ საქმეზე მოსამზადებელი სხდომა 2 მარტს გაიმართა.

ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს 9 ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.

ვეტერანების საქმეზე მოსამართლე გადაწყვეტილებას 19 აპრილს, 3 საათზე გამოაცხადებს.

[თამუნა უჩიძე, ახალციხე]