ვეტერანების სამმართველოს უფროსს რეგიონული განვითარების სააგენტოს თავმჯდომარემ სასამართლოში უჩივლა

ააიპ სამცხე–ჯავახეთის რეგიონული განვითარების სააგენტოს თავმჯდომარე ნანა ზუბაშვილი სასამართლოს მეშვეობით ყოფილი სკოლის შენობაში შესახლებულების გამოსახლებას ითხოვს. ახალციხის რაიონულ სასამართლოში იგი ვეტერანების საქმეთა სახელმწიფო სამსახურის სამცხე–ჯავახეთის სამმართველოს უფროსს დავით ფეიქრიშვილსაც უჩივის.

„ჩვენი სასამარჩელო მოთხოვნაა, რომ თვითნებურად შესახლებულებს შენობა დაატოვებინონ. ასევე საჩივარში მითითებულია, რომ აქ ვეტერანების შესახლება დავით ფეიქრიშვილის მითითებით მოხდა“, – ამბობს ნანა ზუბაშვილის ინტერესების დამცველი ეკა აბაშიძე. მისი თქმით, მიუხედავად იმისა, რომ აქ შესახლებულებმა შენობა დააზიანეს ზუბაშვილი მიყენებული ზიანის ანაზღაურებას არ ითხოვს: "ითვალისწინებს მათ ფინანსურ მდგომარეობას და იმიტომ". ეკა აბაშიძემ საჩივარი სასამართლოში 25 ნოემბერს წარადგინა.

შეგახსენებთ, რომ ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 24 სექტემბერს 9 ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.

[თამუნა უჩიძე, ახალციხე]