ვეტერანები ამ წელსაც სადავო შენობაში გამოიზამთრებენ

ახალციხის მერი ვეტერანებს დამატებით სამი ალეტრნატიული ფართის შეთავაზებას სამი თვის წინ დაჰპირდა, თუმცა, ამ დრომდე უწყებას შენობები არ მოუძიებია. როდის შეძლებს თვითმმართველობა სადავო შენობაში შესახლებულებისთვის ფართის შეთავაზებას, ეს ჯერ მერიაში არ იციან.

სადავო შენობაში შესახლებულებს „სამხრეთის კარიბჭესთან“ საუბარი არ სურთ. აქ ამ დროისთვის ოთხი ოჯახი ცხოვრობს.

შეგახსენებთ, რომ ვეტერანების საქმემ სასამართლოს სამივე ინსტანცია გაიარა. საბოლოო გადაწყვეტილებით მათ უკანონოდ დაკავებული შენობა უნდა დატოვონ.

ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს ცხრა ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.

სასამართლოს საბოლოო გადაწყვეტილების შემდეგ, ახალციხის მერმა ქალაქიდან მოშორებით სამი ალტერნატიული ფართი შესთავაზა, თუმცა სამივე მათგანზე ვეტერანებმა უარი თქვეს.

[ლუბა გიორგაძე, ახალციხე]