სასამართლომ ვეტერანების გამოსახლების გადაწყვეტილება მიიღო

ახალციხის რაიონულ სასამართლოში საბოლოო სხდომა დღეს, 19 აპრილს გაიმართა. მოსამართლე გიორგი ლონდარიძის გადაწყვეტილებით, დაკმაყოფილდა ახალციხის მერიის სარჩელი ყოფილი სკოლა–ინტერნატიდან თვითნებურად შესახლებული 9 ოჯახის გამოსახლების თაობაზე. შენობაში შესახლებულ თითოეულ ოჯახს 120 ლარის ოდენობით ბაჟის გადახდაც დაეკისრა.

ლონდარიძის ამ გადაწყვეტილებამ დარბაზში მყოფი ვეტერანების პროტესტი გამოიწვია.

„აქ ყველა ომის ვეტერანია, ზოგს ასთმა აქვს, ზოგს კანტუზია და ამ ხალხის უსახლკაროდ დატოვება უნდათ?! ისეც გაუსაძლის პირობებში ვცხოვრობთ. არ გავჩერდებით და არც გამოსვლას ვაპირებთ, თუნდაც ავტომატით დაგვადგნენ და დაგვიჭირონ, ციხეში თავშესაფარი მაინც გვექნება“, – ამბობს ნინელი მიქელაძე.

ვეტერანები არც სასამართლოს მიერ დაკისრებული ბაჟის გადახდას აპირებენ და ამბობენ, რომ გადაწყვეტილებას ზემდგომ ინსტანციაში გაასაჩივრებენ.

სასამართლოში გადაწყვეტილების გამოცხადებას, დღეს მხოლოდ ვეტერანები და მათი ადვოკატი დაესწრნენ. სასამართლოში მერიის წარმომადგენელი და არც მესამე მხარედ ჩართული ააიპ „სამცხე–ჯავახეთის რეგიონული განვითარების სააგენტოს“ ადვოატი ეკა აბაშიძე, პროცესს არ დასწრებიან.

შეგახსენებთ, რომ ახალციხეში, პეტრე იბერის ქუჩაზე N17-ში მდებარე შენობა, სადაც წლების წინ სკოლა – ინტერნატი იყო განთავსებული, 2016 წლის 24 სექტემბერს 9 ოჯახმა უნებართვოდ დაიკავა. აღნიშნული შენობა ახალციხის მერიის ბალანსზეა, თუმცა ის თვითმმართველობამ 2014 წლის 4 ივნისს უზურფრუქტის წესით (ხელშეკრულება N36) სააგენტოს გადასცა. საკრებულოსა და სააგენტოს შორის გაფორმებული ხელშეკრულების თანახმად, 4 089 კვადრატულ მეტრ მიწაზე განლაგებულ ორ ობიექტში სწავლებისა და გადამზადების ცენტრი უნდა გაიხსნას.



[ლუბა გიორგაძე, ახალციხე]